La Usc di Ladins

Stravardèr l ladin ence ti contesć più delicac de la comunanza, desche chi dediché a la cura e a l’assistenza a la jent de età. Con chest obietif la Region Trentin Sudtirol, aldò de na proponeta del assessor regionèl a la previdenza Carlo Daldoss, à metù a la leta per l an 2026 n contribut de 242.829,48 euro a favor de la Aziendes publiches de servijes a la persona ti teritores ladins, per corir i cosć maores coleé a la doura del lengaz ladin. 
»Volon valorisèr dalbon la cognoscenza e la doura del lengaz ladin ti servijes di teritories ladins – à dit l President de la Region Arno Kompatscher – l é dassen emportant poder ge rejonèr a la jent de età che stèsc te la strutures residenzièles duran sie lengaz mère, percheche chest vel dir respet, vejinanza e calità te la cura. Per chest seghiton a arsegurèr finanziamenc destiné a la Cèses de Paussa, acioche les posse arsegurèr la doura e l stravardament del lengaz ladin«.
La doi strutures toutes ite l é: la Cèsa de Paussa de Fascia, a chela che ge é stat dat n contribut de 22.829,48 euro (schendir l’80% de la speisa stimèda per l personal enciarià de la traduzion di documenc), na strutura residenzièla con 65 posć let (3 olache vegn tout dant jent de età che pel per se e 62 per RSA) e l à 61 dependenc; la Ciasa de Palsa Ojöp Frëinademetz de San Martin de Tor a chela che ge é stat conzedù n contribut massimal da poder dèr fora de 220.000,00 euro. La strutura la tol dant presciapech 89 persones de età e l’à 110 dependenc (de chisc 33 touc su a temp pien e 77 a temp smendrà; 19 no ciapa la endenità linguistica ajache no i à l atestat).


Podede lejer dut su La Usc stampèda dai 21 de aost da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)