La Usc di Ladins

Ncuei daduman riesc do che l gial à ciantà
ei udù che Elon Musk iust nsnuet à trapinà.
Coche uniun te chisc pitli luesc sons scialdi curiëus
perchël cun na mesëina de ciociul ti ei ulù dé l »Benunì danter nëus!«

Ie son cuntënt, ajache l se paia for avëi ujins dal muet
che te juda a udëi l got de champagne mez plën y nia mez uet.
Da cavia ca dëssel unì, chëi dai hamburger y chëi che ie jic sun la luna
y i dij che l dëssa vester n tipo scialdi criatif, l se nvënta for una!

Mi gial cianta, si Twitter cevicernea, ala fin sons pu fac dla medema pasta
cun la desfrënzia che cun l gial ei almanco zeche da mëter te magon n pasca.
Cun bunder ti cëli a si cësa nueva, maissamat tan de cubatura
pu tlo ons pu belau mé plu acel y zement, plu che natura.

Ulache l bon Giuani  ova mo dant la poza da chetum
iel śën n bani ipertecnologich… y danz plu de un.
Unfat, cun n ujin iel for miec ujiné, chël ie n dat de fat
ajache n tel ie mo bon de cherdé l aucat, mé ajache ti giat va cun l mat.

de Ivan Senoner, Sëlva

De plu tla edizion stampeda de La Usc di Ladins o sun l e-paper a paiament www.lausc.it/e-paper