La Usc di Ladins

Soms deboriada
Gran Conzert dla musiga dla Val Badia cun i »Saxroyal«, ai 12 de novëmber a Corvara
La Uniun Musighes Val Badia inviëia a n conzert particolar, che vëgn tigní en sabeda ai 12 de novëmber dales 20:00, tla hala dl tennis da Corvara. Al sará da aldí la musiga dla Val Badia sot la direziun de Georg Plazza, deboriada cun le grup de saxofonisć »Saxroyal« de Osttirol. Plü co n conzert, dessel ester na sëra de musiga, de ligrëza y de aurela cörta por döta la jënt. Insciö sarál da aldí dlungia la musiga dla Val Badia ince i »Saxroyal« da susc, la »Böhmische« da La Val y chëra di jogn dla Val Badia: na sëra de festa, tratan chëra che al vëgn ince pité val’ da bëre y val’ de pice da mangé.

Training de comunicaziun sön le ciamp de laur
Comuniché damí cun colegs, colaboradus y cliënc. Le Consëi de Formaziun Badia mët a jí n workshop ai 17 y 18 de novëmber a Badia
Chi che tol pert al training ciafará les compe­tënzes che vá debojëgn por ma­najé i raporc interpersonai sön le post de laur. En par­ticolar impararái, por­van fora de porsona, le conzet de »responsabilité dla comunicaziun« y chël dl reconescimënt y sfruta­mënt dla comuni­caziun nia verbala – plü avisa, dl lingaz dl corp.
Arjunje les competënzes scientifiches che vá debojëgn por comuniché a livel profescional cun n vantaje competitif ti confrunc dl’atra pert: te aziënda, cun le chef, cun i colaboradus, cun i cliënc y fornidus y te n team de proiet.
Le training é ponsé por düc chi che ó mioré sües competënzes tl ciamp dla comuni­caziun profescio­nala. Al vëgn tigní tla Ciasa J.B. Runcher a Badia, ai 17 y 18 de no­vëmber. Le pröm de dales 9:30 ales 17:30, le secundo de dales 9:00 ales 17:00. Referënt é le dot. Aldo Merini dl’Assoziaziun Telos.

Jüc por döta la familia
En jöbia ai 10 de novëmber röiel a La Ila le »Spielemobil« cun jüc por döta la familia, che an pó ince s’impresté fora
Le bus dai jüc dl »Spieleverein dinx« storjará indô pro a La Ila. Plü avisa en jöbia ai 10 de novëmber dales 15:30 ales 17:30, te biblioteca pro la Ciasa dla Cultura.
Pici y gragn pó passé n domisdé d’aurela cörta cun na gran cerna de jüc da mësa. N espert dará consëis y spligará les regoles di jüc, che an podará ince s’impresté fora.

Teater »Te camping«
L’Uniun Teater La Ila é tl laur da arjigné ca le teater da ri »Te camping« (titul orignal »Bären«) de Frank Pinkus. Premiera ai 12 de novëmber
Le teater che vëgn presenté a La Ila vëgn arjigné ca sot la rejia de Erika Castlunger, les löms de Luca Pizzinini. Sön paladina sarál da odëi: Ellen Alfreider, Marco Moscon, Daniele Pescoll­derung, Andy Pizzinini, Roland Pizzinini, Daniel Rubatscher, Sabine Rudiferia, Tobias Stampfer, Susann Tavella y Cindi Vittur. Les rapresentaziuns é: sabeda 12, domënia 13, mercui 16, sabeda 19 de novëmber dales 20:30, y domënia ai 20 de novëmber dales 15:00, dagnora tla Ciasa dla Cultura a La Ila. Prenotaziuns: 333 2525740.

Alpha Youth Series – Vita. Creidum. Sëns
Nce chëst ann mët la Union Pasturela Gherdëina

• 
•  

View the embedded image gallery online at:
https://www.lausc.it/manifestazions-y-evenc/21510-manifestazions-atuales-speziales#sigProId84cee21947

a ji diesc ancuntedes dla grupa Alpha Youth Series
Pra uni ancunteda saràl zeche da maië, n argumënt y grupes de descuscion. Na bela y bona ucajion per se ancunté danter jëuni:es y ciaculé y pensé do dla gran dumandes dla vita y dl crëidum.
La prima ancunteda sarà n vënderdi ai 18.11. dala 19:00 te calonia a Urtijëi y la sëires jirà inant a rotazion tla trëi pluanies de Gherdëina. I:la jëuni:es unirà partì su te doi grupes, una dai 13-15 ani y la segonda dai 16-18 ani. L priesc per duta la ancuntedes ie de 120€, te chëles che l ie laite la cëines y l material.
Per se nfurmé plu avisa vëniel metù a ji doi sëires: n vënderdi ai 11.11. dala 20:00 te calonia de Santa Cristina y n sada ai 12.11. dala 18:30 ntan la mëssa di:dla jëuni:es tla dlieja de Urtijëi. Per plu nfurmazions pudëis cherdé su Claudia al 338 6406533 o ti scrì a alphagherdeina@gmail.com. Per se nuté su: forms.gle/KWJf7254x1Kwv3Lq6.

Turnoi de ping pong de Gherdëina
N sada ai 12 de nuvëmber dala 13:30 inant tl tennis curì te Sëlva
L Tennis Club Gherdëina mët a jì n turnoi de ping pong per duc y dutes tl tennis curì te Sëlva, n sada ai 12 de nuvëmber da mesa la doi domesdì inant.
Peles y codles da ping pong vëniel metù a despusizion.
Per nfurmazions y per se scrì ite pòssen cherdé su l numer de telefonn 340 9269085.
L unirà nce trat ora de biei pesć danter chi che fej pea.

Renaud Garcia Fons Trio
I Jëuni de Mujiga de Gherdëina nvieia al cunzert dla grupa Jazz »Renaud Garcia Fons Trio«, ai 10 de nuvëmber dala 20:00 tla Cësa di Cungresc a Urtijëi
Renaud Garcia-Fons ie n musizist franzëus, udù coche un di contrabasisć plu da virtù dl mumënt tl ciamp dla mujiga de dut l mond y dl jazz. L à fat na furmazion de mujiga pra si maester François Rabbath, da chël che l à mparà a cunëscer la mujiga araba, che à nfluenzà dassënn si stil. Rabbath ti à giaurì urizonc nueves per la mujiga mediteranea y ti à nsenià la fundamëntes de si tecnica per l strumënt a archët. Garcia-Fons àscu­men­cià si cariera a Paris te na grupa jazz, ma sona nce te urchestres tlassiches, l à sunà nce tla »Orchestre de contrabases« – na urchestra metuda adum mé da contra­basc – y l fova nce bassist tla »Orchestre National de Jazz«. Renaud Garcia-Fons sona l plu gën n contrabas a cin’ cordes, che ti cunsënt sonns ora dl normal dantal­dut ti tonns plu auc.
Priesc singul: granc:des: 18€; jëuni:es da 14 ai 26 ani: 12€. L proscimo cunzert sarà ai 28.11. a Urtijëi.

»Nëus« de Christian Stl
La Lia Mostra d’Ert-Circolo de Urtijëi nvieia ala mostra de Christian Stl Holzknecht dal titul »Nëus«
»La vita da uni di nes à trat sotsëura, la nes à tëut demez l’aria da tré l fla, n valguni ne se à nianca rendù cont. Śën vivons n tëmp de mudamënt dl pensé, ulache jirà inant nosta vita o de ce viers che la dëssa nes purté. Nëus se muvon suvënz cun o zënza nes rënder cont!«, chësc l pensier de Christian Stl Holzknecht. L pruzes criatif l lascia viver n mumënt de estasa te chëla che l artist cura ora cuntradizions.
L vernissaje ie n vënderdi ai 11.11. dala 20:00 tla sala dla Lia Mostra d’Ert. Ntroduzion de Lukas Plancker.
La mostra sarà da udëi dai 12.11. nchin ai 27.11. uni di dala 17:00-19:00, mierculdi, vënderdi y sada sëuraprò nce dala 20:00–22:00.

La codla sucrëta
La Grupa de Teater de Runcadic nvieia de cuer a unì a ti cialé al pez da rì
La premiere dl pez de Beate Irmisch, che ie unì ciancià tl gherdëina, sarà n merdi ai 8 de nuvëmber dala 20:00 tla Cësa dla Lies a Runcadic. Da dedò saràl mo cater repre­jentazions: n juebia ai 10.11. dala 20:00, n sada ai 12.11 dala 20:00, n dumënia ai 13.11 dala 18:00 y n merdi ai 15.11 dala 20:00, for tla Cësa dla Lies a Runcadic.
Chertes danora iel da giapé tla butëiga dai ciofs Inge a Urtijëi, tel. 0471 796691 o cherdan su l 347 8891516 n’ëura dan che l teater scumëncia.
I:la atëures da udëi sun palch ie: Margit Perathoner, Anna Rumerio, Albert Kasslatter, Toni Kasslatter, Franco Stuffer, Laura Bavastro, Augustine Insam y Martina Pera­thoner. Regia de Gerlinde Malfertheiner.

Le Rait de San Linert
En domënia ai 6 de novëmber vëgnel tigní la 22ejima ediziun dl Rait de San Linert dles valades ladines y de Südtirol
Ince chësc ann tolará pert passa 100 ciavai y zidladus dales valades ladines y da döt Südtirol. La festa mët man cun la santa mëssa dales 9:00 tla dlijia de Badia; dales 10:45 podarán spo odëi la defilada da Pedraces cina a San Linert, a chëra che al tolará pert ciavai haflingers y norics, che le degan Iaco Willeit benediará spo pro paiun. Ala defilada podarán ince odëi de vigni sort de ciars infornis y güces cun i guanc da zacan, les musighes de Badia, Poza y Lijun, le Bal Popular Val Badia y le »Grop de folcklor Cianacei«, val’ scuadra dl rait »Oswald von Wolkenstein« sciöche ince i mituns dla 1a y 2a elementara cun ciavai de lëgn. Por le pröm iade vëgn le Rait ince mostré en direta streaming sön le canal Facebook dl’Alta Badia. La festa jará inant sides tla ciasa dles uniuns a Badia che tla tënda, olache les uniuns di paurs y di stödafüch dá fora spezialités gastronomiches. Domisdé sonará la »Böhmische de Badia« y da sëra le grup »Tiroler Herz«. Intratan podarán ciarcé de bunes ciastëgnes. La manifestaziun vëgn tignida ince en da bur’ tëmp.