La Usc di Ladins

Marcé dl cufer a Corvara
Chësta domënia ai 20 de novëmber dales 10:00 ales 17:00
Do dui agn de palsa sforzada, organisëia la Uniun dles Ëles da Corvara indô le Marcé dl cufer, cun mostra y poscibilité da cumpré patüc fat a man.
Le marcé vëgn tigní en domënia ai 20 de novëmber dales 10:00 ales 17:00, tl salf dles manifesta­ziuns da Corvara. Al sará ince n pice ren­frësch, cun spënora lëdia che jará a bëgn de na familia dla Val Badia.

Multiski: ultims dis por se scrí ite
Le Ski Team Alta Badia organisëia ince chësc invern »Multiski« por mituns y mitans dai 6 cina ai 9 agn. Iscriziuns anter i 26 de novëmber
Por imparé da jí cun i schi te na manira alternativa y plajora y arjigné i mituns y les mitans a pratiché chësc sport a livel agonistich, organisëia le Ski Team Alta Badia »Multiski«, n program de alenamënt che ne ti porta nia ma dant ai mituns y ales mitans le schi, mo ince ativités sportives alter­natives, sciöche le snow­board, le jadiné y le hockey, le pas­lunch, le freestyle y le telemark.
Por che pa?
A »Multiski« pó tó pert i »Super­baby« (nasciüs dl 2016 y 2015), che fej alenamënt n iade al’edema, la sabeda, y i »Baby« (nasciüs dl 2014 y 2013) che fej alenamënt dui iadi al’edema, le mercui domisdé y la sabeda.
Iscriziuns y informaziuns
Les iscriziuns mëss gní fates online anter i 26 de novëmber a chësc link https://forms.gle/1JWd1yAe1BgVmfv66
Por infos: info@skiteamalta badia.it, 339 2975690 (Mar­tina), 335 7875460 (Ste­fan) o 339 1433016 (Thomas).

Incuntada de aministradus:dësses de sostëgn
En mertesc ai 29 de novëmber dales 18:00, tl salf tl’alzada a tera dl Raiun Sozial Val Badia a Picolin
Chësta incuntada é ponsada por porsones che fej bele sëgn chësc sorvisc volontariamënter y ince por jënt che foss interessada tl dagní da surantó chësc compit. Tratan chësta incun­tada á i aministradus de sostëgn la poscibilité da se baraté fora esperiënzes y dübi. A funz stál l’idea che porsones te ciamps de laur spezialisá che se somëia, pó se daidé sön tematiches relatives a süa ativité. Le potenzial, l’esperiënza desvalia y la vitalité dl grup vëgn insciö anuzada deplëgn. Florian Mussner, assessur provizial en ponsiun, baiará de süa esperiënza sciöche aministradú de sostëgn de de plü porsones, cossa che ël fej bele da de plü agn incá.
Le Raiun Sozial Val Badia cun süa cola­boradëssa Sabine Rainer acompagnará le grup tratan l’incuntada. An dess se anunzié al 0474 524519 o sot ala e-mail: sabine.rainer@bzgpust.it Vigni aministradëssa y vigni aministradú de sostëgn é dër bel inviá.

Sentada generala dl Consëi de Formaziun Badia
Ai 22 de novëmber tl Saj.un a La Ila. Dedô él Alexander Liotto che nes cunta »Iö y mia roda... sön le tru de n some!«
Le Consëi de Forma­ziun Badia inviëia a süa sentada generala, che vëgn tignida en mertesc ai 22 de novëmber dales 19:30, tl Saj.un a La Ila.
Pröma pert
Incuntada anuala dl Consëi, aprovaziun dl bilanz 2022, previjiun dles iniziatives por l’ann 2023, aprovaziun dl statut nü. Dötes les uniuns dl Comun é dër bel inviades da tó pert y fá propostes por la formaziun di zitadins.
Secunda pert
Aventöres cun la roda fora por la Talia cun­tades dal jonn Alexan­der Liotto. Im­pre­sciuns y esperiënzes de n badiot che é rodé fora por de plü regiuns talianes. Düc é bel inviá da tó pert!

Edema dla Sanité te Mareo
Ultims dui referac por l’Edema dla Sanité: incö vëndres a La Pli y en doman sabeda a Rina
L’Edema dla Sanité te Mareo vá a piz chisc dis cun i ultims dui referac. Incö vëndres ai 18 de novëmber dales 20:00 vëgnel tigní te Ciasa dles Uniuns a La Pli n referat cun l’esperta de alimentaziun Ivonne Daurú. Tema é »Spëisa por mituns y jogn«, olache la referënta portará dant 5 manires creatives por arjigné na spëisa sana por i jonins, cun rezëtes da se tó para y ince na picia degustaziun.
En doman sabeda ai 19.11. s’incunton dales 20:00 tl salf dles manifestaziuns da Rina, olache le consulënt de tecnologia informatica Andreas Bertolin baiará dl tema »Digitales Wohlbefinden«. Plü avisa jarál ite sön n consum responsabl di media digitai, sciöche ince sön co che an pó passené chisc aparac ai debojëgns efetifs y tó instësc tles mans nosc »bëgnsté digital«.

Marcé da Nadé t’La Spona
En sabeda ai 26 de novëmber vëgnel indô tigní tl zënter sozial »La Spona« a Pidrô, le marcé da Nadé
Chësta ota ésera indô tan inant che i podun ti daurí nostes portes ala jënt dla valada y Ves invié al Mar­cé da Nadé tl Zënter sozial »La Spona« a Pidrô. En sabeda ai 26 de novëmber Ves aspetunse dales 9:00 ales 17:00 por ves mostré ci che i s’un ponsé fora por Os. I pitun gherlandes d’Advënt, idees por scin­cundes da Nadé sciöche linternes, lëgns da Nadé tradizionai y moderns, angeli, scatores de lignan vedl y n gröm d’ater bel patüc.
Domisdé dales 14:30 sarál la Uniun di Ladins Val Badia che presentará döes publicaziuns nöies: »Ala slondra fora por la Val Badia« – n liber-guida de Silvia Costabiei, Silvia Liotto, Marianna Ka­stlun­ger y Daniel Willeit, y »Les aventöres de Pice Dragun« – na storia por mituns de Ingrid Ca­stlunger cun dessëgns de Maria Pizzinini. Al sará ince la poscibilité da cumpré libri de vigni sort. I esson dër ligrëza sce i gnisses a nes ciafé.

Menopalsa… y spo?
Tl Raiun sozio–sanitar Val Badia a Picolin

• 
•  

View the embedded image gallery online at:
https://www.lausc.it/manifestazions-y-evenc/21660-manifestazions-atuales-speziales#sigProId9ff7358993

vëgnel metü a jí na ligna de iniziatives sön la menopalsa, tematica tabu te nosta sozieté: ai 25 y 26 de novëmber y ai 2 de dezëmber 2022
Menopalsa… bëgn y spo? Dla menopalsa ne vëgnel nia ion baié. Al é un di gragn tabus de nosta sozieté. Cun menopalsa, o por todësch »Wechseljahre«, vëgnel definí chë fasa de vita dla ëra, olache le prozes produtif se destöda bel plan ia, o dit atramënter: les mestruaziuns stá bel plan fora. Chësc sozed aladô de statistiches danter i 45 y i 55 agn, mo é dër sogetif y depënn da n gröm de faturs, sciöche le trá do, o ince mara­ties yii. Te chësta fasa che döra de plü agn, vëgnel a s’al dé de plü cambiamënc a gauja dl mudamënt ormonal.
Le corp cambia, an á te n colp i »cialc«, an é plü parentoses, an se stënta da dormí, tla relaziun cun le partner/om él cambia­mënc suradöt a livel sessual. Döt chësc ne mëss nia ester, o miú: i messun imparé da vire chësc tëmp te n’atra manira, cun plü azetaziun de nos instësses y de nosc corp cun n’atra impo­staziun de vita. Al mët man n’aisciöda nöia. Sëgn unse de plü tëmp por nos instësses, i podun lascé ia tröc fistidi, deache i mituns é bele gragn, i podun indô ti jí do a cosses che nes plej y che i un metü n pü’ sön na pert denant. Sëgn él le tëmp por cambiamënc, por sensaziuns nöies. L’ester informades dëida dër, bele por capí miú ci che cambia te nosc corp/te nosta psica y savëi ci che porta pro a nosc bëgnsté.
Tratan chëstes serades, che é dessigü ince interessantes por i omi/partners, gnarál baié de düc i aspec desferënc che á da nen fá cun la menopalsa, adöm a de plü espertes: la ginecologa Yvonne Fauster, la psicologa Angelika Fauster, la fisioterapista Anna Tolpeit, la doturia por reabilitaziun Elisabeth Pizzinini y la dietista Silvia Pitscheider.
Le vëndres ai 25 de novëmber dales 19:30, tl foyer d’entrada dl Raiun sozio-sanitar a Picolin, él sön le program le referat cun la ginecologa Yvonne Fauster y la psicologa Angelika Fauster, cun discusciun y pice renfrësch.
Le de do, la sabeda ai 26 de novëmber dales 9:00 ales 16:30, sarál te salf di Stödafüch a San Martin de Tor le workshop cun infor­ma­ziuns, discu­sciuns, poscibilités da fá do­man­des, eserzizi por la osteoporosa, na marëna adöm y de vigni sort de consëis cun les espertes dla sëra da denant, adöm ala fisioterapista Anna Tolpeit.
Le vëndres ai 2 de dezëmber dales 19:30 él indô tl’entrada dl Raiun sozio – sanitar a Picolin la doturia por reabilitaziun Elisabeth Pizzinini che baiará de osteoporosa y de süa prevenziun, adöm ala dietista Silvia Pitscheider, che informará sön l’alimentaziun tratan la menopalsa.
I referac y le workshop sará por todësch. Por le workshop Ves periunse da ves prenoté anter i 24 de novëmber al 0474 524552. La partezipaziun é debann, la marëna se paia vignöna instëssa. Organisaziun: Comité de Raiun Val Badia.

Nvit ala sëira publica
L’aministrazion de Chemun nvieia duta la zitadines y duc i zitadins ala sëira publica ai 22 de nuvëmber dala 20:00 te Cësa de Chemun a Urtijëi
N chësta ucajion fajerà l ambolt n cheder di proiec plu mpurtanc dl mumënt y da dedò rejonerà assessëures y vel’ cunselier:a di majeri lëures di ultimi y di proscimi mënsc. Do la prejentazions puderàn nce ti cialé ai ufizies nueves dla Cësa de Chemun, derturei su l ann passà, y de se giamië ora ideies y pen­sieres cun i aministra­dëures pra n bon got y zeche da pesslé.
Duc ie nviei de cuer.

Santa Tarina: Segra da Corvara
En vëndres ai 25 de novëmber tl salf F. A. Rottonara a Corvara
I Stüdafüch da Corvara á inô le plajëi da invié ala Segra da Corvara–Santa Tarina, en vëndres ai 25 de novëmber. La festa mët man dales 9:00 cun la mëssa ciantada, por jí spo inant dales 10.00 cun na matinée, che gnará abelida dal »Stefan Santi & Co.«. Dales 14:00 él spo söl program le gran batadú (prenotaziuns al 335 8335841) y dales 20:30 inant él musiga da bal cun »Die Pustertaler«. Por i jogn sarál n tendun scialdé cun musiga de DJ Tino. Da sëra vëgnel pité n sorvisc de taxi debann, che vëgn a do y condüj a ciasa (tel. 348 2620029). Diendl y braia de coran é bëgnodüs.

Amor, tlo iel na morta te stua
La cumedia per talian unirà prejenteda n merdi ai 22.11. dala 20:00 te Cësa di Cungresc a Uritjëi. Per la ntreda vëniel damandà na dunfierta liedia
Oreste y Annamaria ie mari­dei y tla crisa. N aucat dut fat su y da uem, na maestra dla scola elementera cun l cë tla nibles y cun sentimënt for inò desvalif, cuncei ite te na vita da uni di plëina de stritoc y paroles nia dites. Na sëira vën Amelia a i crì, na persona cun carater sterch y segura de sé nstëssa, che cunedësc gën nutizies de sensazion y che tira sotsëura la vita di doi maridei.
Co la tulëssaisa Vo su, sce na psicoterapeuta morta dan vint ani ruvëssa ora de nia ite te vosta cësa?

Fé gherlandes d’Avënt
Ai 26 de nuvëmber uniràl fat gherlandes d’Avënt cun Alma, dala 09:00 nchin la 12:00 tla sënta dla Nëus Jëuni Gherdëina a Urtijëi
Chi che ëssa nteres a fé pea possa se scrì ite nchin ai 23.11., ti scrijan a info@njg.it o cherdan su te ufize al 0471 799006.
Da paië ite saràl 5€ y da tò pea 4 cëiresc y na forfesc per taië la dascia. Se ncun­ferton sun Vosc unì.

San Miculau va ora per la cëses
I pitli y la pitles se ncunforta for inò canche vën San Miculau. Nce chëst ann uniràl metù adum grupes de San Miculau, angiuli y fant che jirà da cësa a cësa a ti fé legrëza a mëndri y mëndres
L’iscrizions vën tëutes su per Sëlva, S. Cristina y Urtijëi da lunesc ai 21 de nuvëmber inant. Per Urtijëi pudëis cherdé su te ufize dla Nëus Jëuni Gherdëina al 0471 799006 dala 10:00 inant, per S. Cristina al Cor di Jëuni de S. Cristina al 333 5491707 y per Sëlva tla Lia dl Turism al 0471 777900.
La lies rengrazia bele danora per l sustëni.

Cunzert de Santa Zezilia dla Mujiga de Sëlva
La Mujiga de Sëlva nvieia de cuer a unì a scuté su l cunzert n unëur de si patrona, de Santa Zezili
L cunzert unirà a s’l dé n du­mënia ai 20.11. dala 10:30 tla Cësa de Cultura te Sëlva, sot ala bachëta de Edy Gam­per. Prejentazion de Claudio De Biasio.
L unirà sunà i pec Bergwelt (marcia de cunzert), Austrian Fantasy, Fate on the Gods, Vaterfreuden (Polka), Moun­tain Moments, Nora – Licht des Nordens, die Wolken­steiner y Alpenwelt.
La ntreda ie cun dunfierta liedia. Sëis duc nviei de cuer y mbincion n bon scuté su.

Ladin pop – usc jones rejona
Podcast nuef de Nadia Moling y Nadia Rungger
N sada ai 03.12. prejenterà Nadia Moling y Nadia Rungger l prim talk de ‘LADIN POP – usc jones rejona« per tudësch, dal vif tl zënter de cultura Astra a Persenon.
Te chësc format nuef rejona jëunes y jëuni de ert y cultura da perspetives desferëntes y te de plu rujenedes. Nsci dëssa la ruje­neda ladina se giaurì a n dialogh che va sëura i cunfins dla rujeneda ora. L rejona: Noemi Call, Valeria Stuflesser, Matthias Trebo. Mujiga: Gota (Jan Moling y Katia Moling). Muderazion: Moling y Rungger. La manifestazion vën sustenida dala scumenciadiva Astra.zero. Duch ie nviei de cuer!
Per plu nfurmazions: https://astrabx.com/zero/ y www.nadia-nadia.it

Calënder Ladin 2023
Al é le 62ejim numer anual tla storia dla »pratica ladina« tla Val Badia y vëgn presenté incö, vëndres ai 18 de novëmber 2022, dales 18:00 a San Martin de Tor
Le »Calënder Ladin 2023« presentëia aladô dla tradiziun i dis y les festes cun i sanc y planëc, n jop de retrac vedli tuc fora dales ciases dla valada, articui sön porsones, aveni­mënc y curiosités desferëntes, cunties y pinsiers. Lapró sarál ince da ciafé fotografies por i 20 agn dala canonisaziun de Ujöp Freinademetz a Roma, y dla prozesciun de Jeun stada chësc ann che vá plan plan a piz. Le »Calënder Ladin 2023« vëgn venü ince en chësc ann te plü botëghes (a Longega y Al Plan), da ciasa a ciasa, al prisc de 15,00 euro. Ala presentaziun tla ostaria Da Nicl a San Martin de Tor sona le ciantautur ladin Arcangelo Obwegs.

Nesc prodoc te noscia valèdes!
La Mèlga de Fascia envia hotelieres e restoradores de duta la valèdes ladines te sia senta a Pera
Sporjer prodoc de nosc raion, cognoscer l’atività de produzion e poder cercèr de persona l é emportant per dezider che ge perferir a nesc ghesć!
Hotelieres e restoradores de la valèdes ladines, ve envion duc en jebia ai 24 de november da les 8:30 a les 11:30 e da les 15:30 a les 17:00 te la senta de noscia Mèlga de Fascia te Strada Dolomites 233 a Pera (Comun de Sèn Jan) per ve fèr cognoscer noscia atività e tastèr nesc prodoc ensema a n bon bicer de vin!
L é benfat confermèr la prejenza se volede tor pèrt inant o domesdì per mail a info@caseificiosocialevaldifassa.it.
Per ogne autra informazion podede chiamèr l numer 340 5875302.

L Comun General ve envia a teater
Prumes doi apuntamenc con I Bontemponi e La Mizacoles
L Comun General de Fascia à endrezà ence chest an la rassegna de teater ladin con cater compagnies de la val che ne farà goder e se grignèr de gust.
Insnet, vender ai 18 de november da les 20:30 te chino de Cianacei e en domenia ai 20 da les 16:00 te tendon de la manifestazions de Poza l é l grop »I Bontemponi« che porta dant la comedia dal titol »I più bie regai no se i fasc ite mai« de Loredana Cont con la regia de David Dorich.
En jebia ai 24 de november da les 20:30 te Oratorie de Moena e en domenia ai 27 da les 15:00 te teater de Ciampedel sarà enveze La Mizacoles che portarà sun paladina l toch »La tradida dessenèda« de Davide Arminio con la regia de Loreta Florian. Siede duc envié de cher!