La Usc di Ladins

Garejeda soziela de schi alpin y pudejé
L Schi Club Gherdëina nvieia duc y dutes a fé pea pra la garejedes sozieles de schi alpin y pudejé, n sada ai 30 de merz sun Pana
L slalom lerch scumëncia dala 09:00 sun l purtoi de Mont Sëura. L sarà deplù categuries y nce una a pert per la families, ulache l muessa fé pea trëi dla medema familia, cun almanco un n grant. La garejeda speed-challenge ie dala 09:30 inant dai palusc tl zënter de pudejé. N possa la fé cun i schi da pudejé y cun chëi da alpin. L vën fat na cumbinazion danter slalom lerch y speed-challenge!
L’iscrizions vën tëutes su nchin ai 29 de merz dala 14.00, mé tres email a info@sciclubgardena.info. L priesc ie de 10€ a persona y 20€ per la families (i atlec dl SCG fej pea debant). L sarà da maië y da bever per duc! La premiazion sarà ntëur la 14.00 tl zënter de pudejé sun Pana, cun scialdi de biei pesć. Una dla families che fej pea à l mesun de vëncer n schipass per la sajon che vën.

Cercia de eghes y premiaziun
A Al Plan vëgnel stlüt jö le proiet »Ega«, cun la premiaziun dl quiz y na degustaziun de eghes dl post
Le Consëi de formaziun d’Al Plan inviëia en sabeda ai 23 de merz dales 16:00 tl salf dles manifestaziuns dl paisc, a na cercia de eghes adöm cun l’idro­sommelier André Hofer: an podará ciarcé y sintí les desfarënzies de plü eghes dl post: ega de Fanes, dla Ücia Lavarella, da Pederü, d’Al Plan, y les eghes di bagns Cortina d’Al Plan, Valdander a Antermëia y Rumestluns a La Val.
Chësc domisdé vëgnel ince tigní la pre­miaziun dl quiz sön l’ega, fat da d’altonn 2023.

Mozart tl dialogh
Na bela sëira de mujiga de strumënc a archët unirà a se l dé n mierculdi ai 27 de merz dala 20:00 tla Cësa di Cungresc a Urtijëi
L’urchestra da camera dla academia de stru­mënc a archët Euregio »Strings in Motion«, deberieda al’urchestra dl Cor de Dlieja de Urti­jëi, nvieia a si cunzert n mierculdi ai 27 de merz dala 20:00 tla Cësa di Cungresc a Urtijëi. L unirà sunà pec de C. Saint-Saens, M. Haydn, J.S. Bach, E. Chausson. La ntreda ie a dunfierta liedia. La doi urchestres se ncunforta sun duc i apasciunei y duta apa­sciunedes de mujiga.

Voktett Hannover & Enrico Bronzi
I Jëuni de Mujiga Gherdëina nvieia a chësc ultimo dla sajon di cunzerc, n merdi ai 26 de merz dala 20:00 tla dlieja de Sëlva
L Voktett Hannover ie nasciù tl 2012 coche ensemble vocal. Cun si truep programs a cappella ie i ot ciantadëures suvënz sun cunzerc y festivals renumei, danter chisc l Bachfest de Lipsia, l Kultursommer Nordhessen, l Rheingau Musik Festival y truep d’autri. L ensemble ie metù adum da Esther Tschimpke y Franziska Poensgen (so­prann), Ida Barleben y Lea Wolpert (alt), Steffen Kruse y Justus Barleben (tenor)  y da Sebastian Knappe y Steffen Schulte (bas). Enrico Bronzi ie n celist renumà dla Talia, che sona dal 2001 incà nce scialdi coche solist.
Ntan la sëira te Sëlva iel sun l program »Elegie«, n cunzert per celo y cor.

»Fitnesslandia« a La Ila
La Uniun Sport La Ila mët a jí d’aurí de plü cursc por gragn y pici
Tl mëis d’aurí mët man »Fitness­landia – aisciöda 2024« – cun cursc organisá dala US La Ila.
Acqua fitness por gragn: jöbia ai 11 d’aurí dales 19:00 tla nodadoia comunala da La Ila. Indöt 7 iadi, al cost de 90,00€. Referënta é Giulia Barp.
Nodé por mituns dla scolina y elementara: mercui ai 10 d’aurí dales 13:45, tla noda­doia da La Ila. Indöt 7 iadi a 90,00€. Refe­rënta é Giulia Barp.
Ginastica 50+: lönesc ai 15 d’aurí dales 17:00 te palestra dla mesana da La Ila. Indöt 7 iadi a 70,00€ (iscriziuns le pröm iade söl post). Refe­rënta é Jazmine Ceballos.
Curs de autodefenüda por jonins/es: mercui ai 3 d’aurí dales 15:00 (scora mesana) y dales 16:00 (scora alta), te palestra da La Ila. Indöt 6 iadi a 70,00€. Referënt é Luigi Belloto.
Curs de autodefenüda por gragn: mercui ai 3 d’aurí dales 19:00, te palestra da La Ila. Indöt 6 iadi a 70,00€. Referënt é Luigi Belloto.
Karate sportif por mituns dla elementara: mercui ai 3 d’aurí dales 17:00, te palestra da La Ila. Indöt 6 iadi a 70,00€. Referënt é Luigi Belloto.
Curs de roller (atrezatöra vëgn imprestada fora y é tl prisc): lönesc ai 8 d’aurí dales 14:00, te palestra da La Ila. Indöt 4 iadi a 60,00€. Referënt é Roberto Sasso.
Iscriziuns online y infos sön www.uslaila.it – infos y assistënza fitness@uslaila.it - Por tó pert ai cursc mësson ince paié ite la cuota de co­membranza tla uniun.

»Calígula«
Le Stadttheater a Bornech presentëia da insnöt inant le teater »Calígula« desco contribut de teater ladin profescionistich dl proiet europeich »phōnē – giving minority languages a voice«
Uma, pere, möta y sëgn ince n vicel: Calígula! I trëi mëmbri dla familia ne ascuta nia pro un y l’atra, düc é cruziá por se instësc y descür püch y nia de sü sentimënc. Cun le tëmp tol ite Calígula tres plü lerch te chësc tiesciü, al asmata parores y frases, se recorda i baiá y les cuntejes, se ghira l’atenziun. Indechëltan sál di familiars deplü co chisc de un y l’atra. Le ritm dla cuotidianeité mët man da se desfanté. Les falzades se sfrogherëia sö. Düc brancia do süa liberté, ince Calígula. Che la ciafará pa? Éra pa davëi inzai?
Al é n toch de teater ladin des­biech, mo al vëgn ince dant te val’ pert le todësch, söl ester liá y sará ia te costruc y realtés, y söla doman­da sce al é bëgn poscibilités da i sciam­pé. Pó pa magari l’inteligënza emo­zionala daidé? O chëra artifiziala?
Idea y libreto: Iaco Rigo, regia: Viktoria Obermarzoner; cun Hanenn Huber, Lisa Laner, Sabrina Fraternali y Mirko Costa, aredamënt y costüms de Ursuala Tavella, musiga de Maria Craffonara, al bala Sabrina Fraternali.
La premiera é incö vëndres ai 22 de merz 2024 dales 20:30, do la »International Night« che mët man dales 18:30 cun presentaziun de plü scenes di teatri dles comunités de lingaz liades a phōnē, la sorba (Budyšin/Bautzen tla Sassonia/Germania) y jiddisch (Bucarest/Romania).
D’atres rapresentaziuns él ai 27 de merz (dales 20:00), en Lönesc de Pasca al 1. d’aurí (dales 18:00), ai 4 y 6 d’aurí 2024 (dales 20:00). Les chertes pó gní resservades söl portal https://stadttheater.eu/

Marcé da Pasca y d’aisciöda t’La Spona a Pidrô
Dal lönesc ala jöbia dales 8:00 ales 15:00 y le vëndres dales 8:00 ales 12:00
I assistis y i assistënc dl salf de laur protezioné »La Spona« á arjigné ca n gröm de bel patüc por Pasca y ince por sëgn da d’aisciöda, sciöche coes y loi da Pasca, decoraziuns da d’ai­sciöda, alces, ciüfs y iarines de lëgn, tasces y rucsoc de peza, de pices tovaies da mëte sot i taís, tepihs y tröp d’ater bel patüc.
I ves aspetun tratan i orars de botëga, dal lönesc ala jöbia dales 8:00 ales 15:00 y le vëndres dales 8:00 ales 12.00.

Marcé da Pasca a Corvara
La plaza de Comun tl zënter da Corvara i fajará da cornisc al marcé da Pasca, che vëgn daurí le vëndres ai 29 de merz
En ocajiun dl marcé da Pasca él de plü artejans y eserzizi dl post che vënn produc de artejanat y decoraziuns da Pasca; al gnará ince dé fora val’ da bëre y val’ picolëza da mangé. Le marcé é davert dal vëndres ai 29 de merz cina al Lönesc de Pasca al 1. d’aurí, dales 10:00 ales 18:00. La sabeda y la domënia án la poscibilité da fá na picia roda a pe fora por paisc cun i alpacas dla Dolomites Farm, plü avisa la sabeda domisdé dales 13:30 ales 16:30 y la domënia danmisdé dales 10:30 ales 13:00. La domënia de Pasca podarán ascuté sö le grup »Santoni Family«, deperpo che an se god na liagna blancia tratan la matinée dales 11:00 inant. Implü pón en Lönesc de Pasca ince cufé pro le marcé te plaza de Comun y la cufada gnará abelida dales melodies dl grup »BöhmBuddies«, dales 11:00 ales 13:00.