La Usc di Ladins

Che me dëida pa? Le Sorvisc dl’assistënza a ciasa!
Ai 28 de merz él a Al Plan n domisdé de informaziun organisé dala Portina por l’assistënza y cura
La Portina por l’assistënza y cura dl Raiun sozio–sanitar Val Badia organisëia n domisdé de informaziun sura le Sorvisc de assistënza a ciasa. Le sorvisc dëida i familiars che fej le guern a porsones atempades, y l’obietif é che les porsones atempades pois sté le plü dî che ara vá te so ambiënt conesciü. Al gnará mostré sciöche la cura dl corp dess gní fata y co adoré i injins sciöche le lift da bagn che dëida alzé ite na porsona tla vasca o le »Rutschbrett« che alisirëia i spostamënc dl assistí p.ej. da n scagn al divan, co fá por evité plaies y d’atres com­plicaziuns. Al gnará ince dé consëis co stimolé la mobilisaziun fajon val’ spazirada o certi movimënc. Implü gnarál mostré co se sconé le spiné da fá le guern. La Portina por l’assistënza y cura dá infomaziuns sön sorvisc, poscibilités de sostëgn y de alisiramënt, sön aiüc che é danman, sön sostëgns finanziars. I sëis bel inviá en vëndres ai 28 de merz dales 13:30, tl salf dla Raiffeisen d’Al Plan a tó pert al domisdé de informaziun.

Acompagné porsones che é tl morí
En vëndres ai 11 d’aurí dales 14:00 ales 18:00 vëgnel pité te te salf dla Raiffeisen d’Al Plan n curs de Ultim aiüt
La fin dla vita y le morí de nüsc parënc, amisc y vijins nes fej gonot pora, ajache al é jü mancia le savëi sön co acompagné ala mort.
Te chësc domisdé él les infermie­res dl Raiun Sanitar dla Val Badia che trasmët les cone­scënzes de basa y che dá ince coraje da ti sté dlungia a chi che mör.
An imparará da socodí y da ti sté dlungia tla dërta manira a porsones che é tl morí. Le curs é debann y por ladin. Al é da s’anunzié anter i 9 d’aurí pro Angela Zingerle al 338 2430045.

La pel y si problems – alergies y tumores
L Kvw de Sëlva mët a jì n referat n con’ de chësc argumënt n mierculdi ai 26 de merz dala 19.30 tla Pitla sala dla Cësa de Cultura de Sëlva
La pel ie l majer organ de nosc corp y l ie lià a truepa problematiches coche aler­gies y de plu sortes de tu­mores. Ciuna terapies vë­niel pa metù n droa y cie pòssen pa fé coche preven­zion?
Ai 26 de merz rùvel te Sëlva a rujené de chisc argumënc n vëir’ espert: l primar dla dermatologia dl spedel de Bulsan Univ. Prof. DDr. Klaus Eisendle. Duc ie de cuer nviei a unì a scuté su. Sambën saràl nce la pusci­bltà de ti fé dumandes.

Fede,

• 
•  

View the embedded image gallery online at:
https://www.lausc.it/manifestazions-y-evenc/29133-manifestazions-atuales-speziales#sigProId6c38c98ec5

pesc y veres
Ai 27 de merz dales 19:30 él tla Ciasa Runcher a Badia n referat cun don Paolo Renner, olache an baia de fede y religiuns, de pesc y de veres
»De pace fidei«: insciö â le car­dinal Nikolaus Cusanus intitolé so liber do che i türc â concuisté Costantinopoli tl 1452. Mo á pa la fede y les religiuns dagnora promoiü la pesc y nia les veres?
Ci é pa jü a sbüja tl passé, ci po­­dunse pa imparé, co podunse pa splighé i conflic d’aldedaincö y co messunse pa se möie sciöche cherdënc de deplü religiuns?
Deplü vëgnon lassura pro n referat cun don Paolo Renner, en jöbia ai 27 de merz dales 19:30, tla Ciasa J. B. Runcher a Badia. Organisaziun: Consëi de formaziun Badia.

Gara por le »Re dla Falda«
Te na gara dër particolara, cun percurs danter portes y ostacui, gnarál incoroné le Re dla Falda. L’apuntamënt cun le telemark é en mercui ai 26 de merz da sëra, sön la pista Doninz-Gardenacia a La Ila
Düc i amisc dl telemark, prinzipianc y pro­gredis, simpatisanc y nia, é inviá ala festa dl telemark »La Falda«, en merui ai 26 de merz dales 20:00 ales 22:00 sön la pista Doninz-Gardenacia a La Ila. Te chësta ediziun d’La Falda gnarál incoroné le Re dla Falda – le telemarcher plü asvelt dla serada. An fajará la gara classica a tëmp: dal mëteman messará le concorënt sburlé por fa na gran ota, dedô trá n salt olache le concorënt ará da arsí en telemark (na juria valutëia la dërta posiziun, zënza él penalités). Ara vá inant cun le rové la gara indô sön n percurs de portes. L’elm é obligator. La gara é debann. Do la gara vára inant cun n pice party tl re­storant pizzeria La Bercia a La Ila. Informaziuns sot a info@uslaila.it o por WhatsApp al 329 8627658.

Prejentazion dl Geoportal
L Museum Gherdëina nvieia a la prejentazion nterativa dl Geoportal - n portal di bëns culturei dl raion de Gherdëina - n lunesc ai 24 de merz dala 18:00 tl Museum Gherdëina
La plataforma digitela che mët n relazion l patrimone culturel, la cuntreda y la memoria te na maniera inuvativa - vën prejenteda te na manifestazion ufiziela ai 24 de merz dala 18.00 tla gran sala dl Museum Gherdëina.
L Geoportal cunlieia passa 200 ogec raprejentatifs dl patrimone storich y archite-tonich dl raion cun si cuntreda unica y crieia n puent danter passà y prejënt. Che n sibe dl luech, ghesć, studënc o studëntes o tuadëures – l Geoportal mostra Gherdëina da na pruspetiva nueva.
Daldò puderàn vijité l Museum y ti cialé da daujin a n valgun pec. La ntreda ie debant.
Per de plu nfurmazions: 0471 797554 – info@museumgherdeina.it.

Mostra – L tier te mé
N vënderdi ai 21 de merz vëniel giaurì tla galaria Vijion a Puntives na mostra dal titul »L tier te mé«. N chier respostes ala dumanda de coche ie al didancuei l raport danter persona y tier
Bele l titul dla mostra »l tier te mé« mët dancà la descendënza dla persona dal tier y si carateristiches che purton te nëus. La persona à for abù na gran atrazion per i tieres y si cumpetënzes che ie da for incà unides amiredes. Dl auter viers vëni sfrutei y malterjei. L liam che la persona à cun i tieres dëssa purté a na cunvivënza cun plu respet y armunia.
La doi artistes Valentina Andrees-Reschetizka y Emily Oberschmied, che mët ora tla mostra, va ite avisa te chësta tematica.
La mostra sarà da udëi nchin ai 14 de auril, dal lunesc nchin la sada dala 16:00–19:00 o cherdan su l numer 338 2098697.

»PESC«
N ucajion dla mostra temporanea »Die Hutterer« tl Museum de Tluses, vëniel metù ora nce na mostra coletiva n cunlaurazion cun UNIKA dal titul »Pesc«. La giaurida ie n vënderdi ai 28 de merz dala 19:00
Ala mostra temporanea »Die Hutterer. Eine Spurensuche in Klausen« vëniel juntà pro na mostra coletiva de artisć:tes dl’UNIKA de Gherdëina dal titul »Pesc« – n valor che lieia tramedoi mostres metudes ora tl Museum dla zità de Tluses, che fej pert dla scumenciadiva per l ann di museums dl Euregio 2025, »Cialé sëur’ora«, y fej referimënt ala comemorazion dla viera di paures dl 1525.
La mostra nvieia a se lascé ispiré da nterpretazions desferëntes y crì n dialogh n con’ dla pesc te si truëpa fassëtes.