La Usc di Ladins

Doi poejies de muvimënt
L Circolo – Lia Mostra d’Ert nvieia ala segonda edizion dl festival de bal n vënderdi ai 27 de juni dala 20:30 tla Cësa di Cungresc a Urtijëi
L dejidere dl Circolo – Lia Mostra d’Ert ie de lië la belëza dl bal ala cun­tredes dla valedes ladines, che fej mprescion.
L ie n’ucajion per valorisé, tres l’ert, la mpurtanza storica y nce turistica dl raion, cher­dan adalerch n gran numer de vijitadëures, danter partezipanc, ghesć y publich dla mani­festazion. Cuer y zënter dl pruiet ie la produzion de na manifestazion de bal cun i balarins Ana­stasia Kostner, Riccardo Meneghini, Sa­brina Fraternali, Camilla Bundel de »Tanz­schmiede/Fucinadanza«. La prima pert dla sëira ie »Fremde Freunde« (20 menuc). Do n intermezzo (10 menu), saràl da udëi la segonda pert »Cyclic Bliss« (40 menuc).
La lia nvieia nce al lauratuere de bal »Doi poejies de muvimënt« cun Anastasia Kostner y Riccardo Meneghini, n merdi ai 24 de juni dala 20:00, tla Cësa di Cungresc a Urtijëi. Per plu nfurmazions n con’ dl workshop y per resservé chertes per l balet cherdé su l numer 377 5936350.

Vins alaleria
Cërcia de na seleziun di mius vins de Südtirol amesa la natöra
Ince chësc isté vëgnel indô invié ia tl’Alta Badia la scomenciadia »Vins alaleria«. An podará tó pert indöt cin’ iadi danter jügn y setëmber, olache an gnará pro da ciarcé na seleziun di mius vins de Südtirol. N sommelier spligará les saus di vins deperpo ch’an podará se gode la bela contrada da munt incëria. Vigni cërcia se roda incër na tematica ia, sciöche por ejëmpl vins blanc o cöci, vins spumanc o vins da plü alalt. Por tó pert ala scomenciadia mësson se scrí ite pro un di ofizi turistics dl’Alta Badia o online, olache an pó ince ciafé le program cun dötes les informaziuns. La pröma cërcia vëgn tignida ai 25 de jügn dales 14:30 pro les cascades de Pisciadú a Calfosch y i atri apuntamënc é preodüs por i 16 de messé pro le Lech da Som­punt, ai 13 d’agost al Sas Dlacia, ai 27 d’agost fora por le tru di artisć y ai 3 de setëmber sön Col de Lastëi a Badia. Vins alaleria vëgn metü a jí da Alta Badia Brand deboriada cun le Consorz di vins de Südtirol y la Uniun di Sommeliers de Südtirol.

Panorama Music con mendranzes
Dai 28 de jugn ai 7 de setember te Fascia conzerc da sera a La Grenz e de dì a l’averta te nosc bel ambient
L é ruà a la X edizion l Val di Fassa Panorama Music, rassegna che ence chest istà sporc na lingia de conzerc, tant a l’averta ti lesc pano­ramics sa mont o ti pre apede a mèlghes e refuges che da sera tel Music Club La Grenz de Moena: posć olache se pel apede sorì coi impianc o ence a pe.
La rassegna, che pea via ai 28 de jugn e la jirà inant fin ai 7 de setember, la vegn me­tuda a jir da la sociazion de cultura e musega La Grenz de Moena con la direzion artistica de Enrico Tommasini e chest an, col projet »Len­gac de mendranza, musega, èrt e letradura« sostegnù da Region Trentin-Südtirol, Provinzia de Trent, Comun General de Fascia e Comun de Moena, na pèrt emportanta vegn resservèda a gropes e musizisć da la Ladinia, da la Cata­lunya, da la Sardegna, dal Friul e dal Südtirol.
Chesta la pruma pèrt del program:
Ai 28 de jugn da les 21:30 al Music Club La Grenz e ai 29 da les 13:00 a la Malga Peniola de Moena i catalans »Barcelona World’s Music Ensemble«
Ai 2 de messèl da les 21:30 a La Grenz e ai 3 da les 14:00 te Fuciada »Cûr di veri« di furlegn Leo Virgili, Ni­cole Coceancig, Davide Raciti e Valeria Liva
Ai 6 de messèl da les 11:30 ló dal Hotel Bellavista sun Pecol i ‘Pëufla’ da Gherdena
Ai 13 de messèl da les 11:30 sun Ciampedie »Gavino Murgia Mediterran Trio« da la Sardegna
Ai 20 de messèl da les 11:30 sun Lujia ló dal Chalet Valbona l »Chum Tribute« di ‘Maestres de schi’ da Fascia, (Tommaso Dondio, Nicolò Dorich, Tita Dorich, Giam­paolo Chiocchetti e Franz Dethomas)
I conzerc i é duc debant, l program é su Face­book e Instagram Val di Fassa Panorama Music e sul sit fassa.com.

Segra da Rina
La Musiga da Rina inviëia da gní a fá festa por la segra dl paisc, ai 28 y 29 de jügn
La festa dla segra mët man la sabeda ai 28 de jügn dales 18:00, cun n aperitif. Inant vára cun la poscibilité da cené, olache al vëgn pité n tris de balotes cun craut, o galüc al curry cun riji. La serada vá inant cun musiga dal ví cun Laura y Hubert Dorigatti.
La domënia sarál la santa mëssa da festa cun prozesciun y dedô matinée cun liagnes blances. Da misdé sarál de vigni sort da mangé: val’ de duc, café, fortaies, tutres ez., y musiga cun Dominik y Michael. Domisdé él la musiga da Gais che tëgn conzert y söl tert domisdé él musiga da bal cun »Wiu und di oane«. Por le mangé y le bëre fistidiëia la Musiga da Rina. Dilan a düc chi che dëida de val’ vers por che la segra garetes.

»Dolomuay Thai« – cumbatimënc de Muay Thai
La Scola de Muay Thai de Gherdëina mët a jì n dumënia ai 29 de juni dala 14:30 inant tla palestra dla scola elementera de Urtijëi cumbatimënc a livel amaturiel y prufesciunel
L fajerà pea atlec y atletes dla Talia – sambën nce dla grupa de Gherdëina – Paejes Tudësc, Spania y Tailandia.
I cumbatimënc scumencerà cun i mëndri per jì pona su man man de livel. Ntëur la 18:00 cumbaterà i prufesciunisć de livel scialdi aut, che cumbat zënza prutezion: danter chisc nce Desiree Righi de Passaier, atual­mënter cam­piunëssa europea, che cumbaterà con­tra Ylenia Ciaccia de Roma, che tën n re­cord de 21 cumbatimënc zënza prute­zion, de chisc 18 venciui.
Chertes: 30 €, da pudëi cumpré sun i-ticket.it. Per plu nfurmazions: 366 208 0831.