La Usc di Ladins

Fá le ciüf de Santa Maria
Le Museum Ladin inviëia a n laboratore por adulc, cun Loise Verginer, en jöbia ai 14 d’agost tl Museum Ladin Ciastel de Tor
Fá le ciüf en ocajiun de Santa Maria dal Ciüf é öna dles plü beles tradiziuns da d’isté. Por tigní inant chësta usanza, mët le Museum a jí n curs da fá i bi cësć tradizionai cun erbes de medejina y ciüfs d’urt, por i porté spo a benedí. Le laboratore vëgn partí sö te dui grups: le pröm grup dales 14:30 ales 16:00; le secundo grup dales 16:00 ales 17:30. Al pó tó pert al plü 10 porsones por grup.
Le prisc de partezipaziun é de 15,00 € a ce. I ciüfs, les erbes y le cëst vëgn metüs a despo­siziun dal Museum. Al é da s’anunzié ala mail prenotaziuns@museumladin.it o por tele­fon al 0474 524020.
La manifestaziun é organisada en colaboraziun cun le Consëi de formaziun San Martin.

Iade musical tl’America
Festival Badiamusica: ai 9 d’agost dales 21:00 él te Ciasa dla Cultura a La Ila n conzert cun l’ensemble »Windkraft«
»Once upon a music in America«, é le titul dl conzert che le Festival Badia­musica pîta en sabeda ai 9 d’agost dales 21:00, tla Ciasa dla Cultura a La Ila. Protagonist é le »Windkraft En­semble« cun Antionio Aiello y Luca Falasca ala vidora, Luigi Azzolini ala viola, Leonardo Sapere al violoncello y Ro­berto Gander al clarinet. Chësta sëra vëgnel sorví n iade afascinant fora por le monn sonur dl’America. Cun toc de Luis Enrique Bacalov, Leonard Bern­stein, Nino Rota, Ennio Morricone, John Williams y Leroy Anderson, coliëia chësc conzert musiga da film, l’energia de Broadway y toc orchestrai. Viede na esperiënza de incherscimun, pasciun y melodies zënza tëmp, olache musiga y naraziun se incrujëia.

La magia dl baroch
Festival Badiamusica: ai 20 d’agost él le »Duo Bieber« che porta dant a Corvara les »maestries baroches por fabló y cembalo«
Le festival Badiamusica pîta en mercui ai 20 d’agost dales 20:30 n conzert te salf dles manifestaziuns da Corvara. Sön paladina podarán aprijé le förtl musical dl »Duo Bieber« cun Vera y Patrizia Bieber, che porta dant le conzert dal titul »Le Baroch magich: maestries por fabló y cembalo«. An podará porchël aldí toc che alza fora le monn sonur afascinant dl Baroch – n monn che é caraterisé da na gran varieté de caraters y umors. 
Te chësc program ves aspeta sonates virtuoses y variaziuns plënes de fantasia de Johann Sebastian Bach, Georg Philipp Telemann y Jakob van Eyck. La jona Vera, che sona le fabló, y süa so Patrizia, che sona le clavicembalo, ves portará fora por la sëra cun na presentaziun dala bona löna y ves fajará fá n iade tl monn magich dl Baroch.

Festa de Santa Maria dal Ciüf a La Ila
Le paisc da La Ila zelebrëia la festa de Santa Maria dal Ciüf cun na defilada dedicada ai 100 agn di Stüdafüch da La Ila
En vëndres ai 15 d’agost vëgnel tigní la festa de Santa Maria dal Ciüf a La Ila cun la mëssa y prozesciun danmisdé. Dales 11:00 inant mët spo man la festa alaleria, tl pre dlungia la scora dai schi, cun le conzert dla Müjiga da La Ila. Les uniuns di Stüdafüch y dla Müjiga da La Ila se crüzia da dé fora da bëre y da mangé, sciöche spezialités ala grilia, polënta y tutres. Dales 13:00 inant él l’Uniun Bal Popolar Val Badia che presënta i bai tradizionai. La defilada tradizionala, che gareta domisdé, é dedicada en chësc ann al iubilé di 100 agn di Stüda­füch, cun n iade fora por la storia de chësta uniun, y an podará ince odëi n ciar dediché ai 40 agn dles gares de Copa dl Monn de schi sön la Gran Risa. La defilada vëgn acompagnada dales musighes da La Ila, La Val y San Martin. Do la defilada pón ascuté sö le conzert dla Musiga da San Martin y da sëra sarál le grup »TirolingStones« che sona.

Presentaziun dl liber »Quando il bosco imparò a volare«
Le Museum Ladin inviëia ala presen­taziun dl liber de Arianna Papini (Editur Bacchilega Junior), en mercui ai 13 d’agost dales 17:00, tl Museum Ladin Ursus ladinicus a San Ciascian
Chësc liber é gnü cherié do la tempesta »Vaia«, cun l’intenziun da eduché y sensibilisé mitans, mituns y adulc da afronté evënc naturai estrems tres le stromënt dl’empatia. 
Do la presentaziun dl liber, tignará l’auturia n la­boratore creatif por adulc, mituns y mitans. Entra­da debann; la manifestaziun é por talian. Informaziuns plü menüdes ciafon por mail a info@museumladin.it o por telefon al 0474 524020.

Vites scundudes tla montes
Tla Galaria de Fìe, sun plaza de dlieja, saràl la giaurida dla mostra de Wilhelm Senoner, ncuei, vënderdi ai 8 de agost dala 19:00
Tla storica galaria de Fìe prejënta l artist Wilhelm Senoner na selezion de scultures y depënc, te chëi che l partësc lecorc, mprescions, pensieres y dejideres. La Dolomites à n pëis fundamentel: la figures se ascuend danter purons y parëis - l artist cunësc chisc crëps y la montes da pitl insù y duc si lecorc devënta ispirazion per si scultures y si strutures.
La natura ie la prutagunista prin­zipela de chësta mostra y l chiet ie n argumënt che vën for inò tematisà.
La mostra resterà davierta nchin ai 20 de agost, dal merdi nchin la sada dala 16:00 - 19:00 y de sada nce danmesdi, 10:00 - 12:00.

Mostra de Leonora Prugger
L’artista nvieia ala giaurida dla mostra sa Pilat, sëura Urtijëi, n sada ai 16 de agost dala 11:00. La mostra sarà davierta nce n dumënia ai 17 de agost dala 9:00 nchin la 18:00
I depënc a uele de Leonora Prugger trata te na maniera artistica l argumënt dla »Plantes endemiches dla Dolomites«. Te chësta uca­jion uniràl nce prejentà na si publicazion n con’ de chësta tematica.
Silvia Demetz prejenterà l catalogh y Rafael Prugger rujnenerà dla plantes ende­miches.
Daldò suneràl la grupa ACAJO y l dajerà nce velch da bever y da maië. Duc ie de cuer nviei.

»NATURAL-MENTE« - mostra coletiva
L Tublà da Nives à l plajëi de nvië a chësta mostra de 9 artisć. La giaurida sarà n sada ai 9 de agost dala 18:00 
La mostra mët adum nuef artisć cuntemporans, che vën da cuntesć, esperienzes y manieres d’esprescion desvalives, ma che ie liei dala medema ghiranza: chëla de dé na vijion per­sunela y poetica de nosta relazion cun l mond naturel. Doi anes se anconta tl’esposizion: da una na pert la scultura, lieda ala tradizion de Gherdëina, bona de ti dé forma a esperienzes; dal’autra pert la pitura, che vën da regions desvalives dla Talia, che va ala descurida de cuntredes nmaginedes, metamorfoses simbo­liches y vijions oniriches. 
Artistes y artisć che mët ora: Alessandra Carloni - Armin Grunt - Chelita Zuckermann - Hubert Mussner - Ivan Lardschneider - Mario Ricci - Matthias Kostner - Silvia Sca­ringella - Walter Pancheri. Ntroduzion artistica: Marta Banci y Emanuele Lamaro.
La mostra sarà da udëi nchin ai 7 de setëmber, uni di ora che l lunesc, dala 16.00 nchin la 19.00 y de merdi, mierculdi y vënderdi nce dala 20:00 - 22:00.

»Feelings on Ice« – Memorial Robert Spath
Ai 14 de agost, dala 18:00 se trasfurmea l stadio dala dlacia Pranives te Sëlva te na paladina per na manifestazion culturela y sportiva
Manuel Piazza y Júlía Sylvía Gunnarsdóttir nvieia, n cun­laurazion cun l Circolo-Lia Mo­stra d’Ert, a na show unica. L pèr de jadiné artistich dla Talia y dl’Islanda iluminerà la dlacia de Sëlva, deberieda cun i atlec dl Ice Club Gherdëina y d’autri nvei. L spetacul de ert, pascion y tecnica durerà plu o manco 60 menuc.
La ntreda ie a dunfierta liedia - cie che vën trat ite ti va a na familia che à n gran bujën.
L sarà na prejentazion che lascerà zënza paroles - nuzëve duc de chësta ucajion!

Isté sön la dlacia
N spetacul söla dlacia cun atlec taliagn y internazionai, sciöche ince l’Ice Club Alta Badia, vëgn tigní en mercui ai 13 d’agost
En mercui ai 13 d’agost gnarál metü a jí n spetacul söla dlacia dal titul »The Sound of Freedom«, tl stade dala dlacia a Corvara. Les jadinadësses y i jadinadus dl Ice Club Alta Badia dauriará la sëra cun na coreografia de grup adöm a Felix Oberbacher, y la secunda pert gnará inaugurada dala esibiziun de Lea Marie Castlunger. Lapró podarán ince odëi n valgügn atlec profescionisć sciöche la campionëssa taliana Lara Naki Gutmann, Ginevra Lavinia Negrello, Gabriele Frangipani, le per italo–islandesc Julia Sylvia Gunnarsdottir & Manuel Piazza, i fredesc Katerina Mrazkova & Daniel Mrazek y le grup de jadiné sincronisé Ice on Fire. Le spetacul vëgn acompagné dales melodies ala vidora de Pierpaolo Foti. Les chertes de entrada pó gní cumprades bele danfora ti ofizi turistics, sön la plata in­ternet dl’Alta Badia o diretamënter la sëra dla mani­festaziun dales 20:15 inant, al prisc de 25,00€ por i adulc, 15,00€ por i iuniors dai 7 ai 14 agn. I mituns sot a 6 agn pó ite debann.