La Usc di Ladins

Cëna sot les stëres
Na mësa y n menü sot le firmamënt: chësc é ci che ti aspeta ai partezipanc, ai 30 de jügn a Calfosch
A Calfosch vëgnel metü a jí por le pröm iade n evënt particolar, le mertesc ai 30 de jügn. Te plaza dan dlijia vëgnel metü sö na gran mësa lungia, por mëte a jí na cëna sot les stëres. Deplü hotí, restoranc y üties dl post arjigna ca n menü spezial, dediché ales erbes aromatiches. Ince n’esperta de erbes spligará les proprietés dles erbes che vëgn adorades tl menü y an á ince la poscibilité da tó pert a n’escurjiun adöm ala esperta de erbes dales 14:30. La cëna, cun menü a 5 derzades y boandes lapró, mët man dales 19:30 y costa 110,00€ a porsona. Deplü informaziuns ciafon sön la plata internet www.altabadia.org o ince ti ofizi turistics, olache an pó fá la prenotaziun ma por la cëna o por la cëna y l’escurjiun. Sce al foss bur’ tëmp, vëgn la cëna spostada ai 2 de messé, en chësta data zënza l’esperta de erbes.

3 ani, 3 chedri
L Circolo–Lia Mostra d’Ert nvieia a unì a ti cialé ala mostra te vedrina de Lili Rosalia Schwingen
I trëi chedri »Krampus und Helau«, »Kraxenträger« y »Splitterfasernackt« se dà ju cun la storia, la tradizion y la cultura dla valeda. Chësta tematiches vën tratedes tres si esperienza tla valeda y la cunscidrazions de chësta, sibe da dedite che nce da dedora.
Lili Rosalia Schwingen (na­sciuda tl 2006) ie unida tl Li­zeum d’Ert Cademia tl 2023 coche sculea tudëscia y ie jita iló a scola per trëi ani.
I lëures te vedrina sarà da udëi dai 30 de juni nchin ai 8 de lugio.

Segra da Rina
La Musiga da Rina inviëia da gní a fá festa, ai 27 y 28 de jügn, por la segra dl paisc
La festa por la Segra da Rina mët man la sabeda sëra, ai 27 de jügn, dales 18:00 inant, cun n aperitif y musiga dal ví. Da cëna vëgnel pité bales frëntes (Pressknödel) cun craut o galüc al curry cun riji. De duc él balotes da marili cun sos de vanilia. La serada vëgn abelida cun musiga dal ví cun le grup »Mawalaaa« y »DJ Robby«. La domënia ai 28 él dales 8:15 la santa mëssa en onur de San Pire y San Paul. Dedô él matinée cun liagnes blances. Da misdé sarál de vigni sort da mangé, val’ de duc, café, fortaies, tutres y musiga cun la Böhmische »A Watta guit«. Domisdé sona la Musiga da Rasun Dessura y söl tert domisdé él musiga da bal cun »Feiwolawi«. Por le mangé y le bëre fistidiëia la Musiga da Rina, che i dij dilan a düc chi che dëida de val’ vers por che la segra garetes.