La Usc di Ladins

»The Rite Duo« a Corvara
Le Festival Badia musica pîta en lönesc ai 24 d’agost dales 20:30 n conzert tl salf dles manifestaziuns a Corvara, cun n repertore por clavier, ince a cater mans
»The Rite Duo« é metü adöm dai dui pianisć Marco Rinaudo y Stefano Visintainer. Le duo é impegné ativamënter te na seria de pro­­iec che tol ite le repertore por clavier a cater mans y dui claviers. 
Tl conzert podarán aldí le proiet musical »Di fontane e pupazzetti«, früt dla inrescida de repertore por clavier a cater mans de com­ponisć talians dla generaziun di agn Otanta dl 800 y atifs ti pröms agn dl ’900, sciöche por ejëmpl Alfredo Casella cun »Pu­pazzetti op.27«, »Sei Piccoli Pezzi« y »Fontane di Roma« de Ottorino Respighi. Chësc ultim program é deventé ince na realté discografica y é da ciafé sön la maiú pert di canai de strea­ming de musiga. 
»The Rite Duo« pîta rego­larmënter sü laurs te posć da conzert desvalis tla Talia y ince foradecá, cun conzerc tl Portugal, tla Spagna, tl’Irlanda y te d’atri Paisc europeics. Ai 24 d’agost dales 20:30 sonai a Corvara.


Final musical cun le »Rodas Quartett«
L’ultim conzert de chësc isté por le Festival Badiamusica é en vëndres ai 30 d’agost dales 20:30, tla Ciasa dla Cultura a La Ila. Cianties popolares rumances y di Grijuns
Sön paladina él le »Rodas Quartett« (parora rumancia por ’rodes’) cun Corin Curschellas, Pa­tricia Draeger, Andrea Kirchhofer y Barbara Gisler. La musizista Corin Curschellas é con­scidrada la »gran dama dla chanzun ru­mantscha«, dal momënt che ara s’á dé jö cun les cianties popolares rumances-retiches che vëgn dales tradiziuns orales y dales coleziuns d’archif. 
Les cater musizistes de »Rodas« porta dant les cianties vedles. Les variaziuns di toc po­polars de »Rodas« é arcaiches, jazzistiches, modernes, atuales y emozionantes, sciöche n caleidoscop musical ví, da corú, emozionant y che roda. Le program tol ite cianties popolares rumances, cianties tradizionales di Walser di Grijuns, cianties dles valades talianes di Gri­juns, musighes sön poesies rumances te düc i idioms, sciöche ince toc tl dialet de Coira, scrites da Curschellas.


Na cascada de saus
I pra sot ales cascades de Pisciadú i fajará da cornisc ala manifestaziun gastronomica ai 25 de agost
En mertesc ai 25 de agost vëgnel metü a jí a Calfosch la manifestaziun gastrono­mica »Na cascada de saus«, plü avisa ti pra sot ales cascades de Pisciadú. Acom­pagná dal sonn dla natöra y dl’ega gnarál pité deplü spezialités gastronomiches tra­dizionales sciöche tutres y fortaies mo ince deplü sorts de panins, liagnes, spezli cun fonguns y ciajó, y al ne manciará sambëgn nia val’ de duc sciöche strudl, iogurt y »buchtli«. Deplü strotöres dl post sciöche ince uniuns dl paisc arjigna ca le patüc da mangé. Na cascada de saus mët man dales 11:30 y döra cina ales 17:00. Le de gnará abelí dales melodies di grups »Vic & Daniel« y »Frisch g’strichn«. Sce al foss bur’ tëmp, vëgn la manifestaziun spostada ai 27 de agost.


Panorama Music con mendranzes
La furlana Elsa Martin en sabeda ai 22 da sera a La Grenz e en domenia ai 23 inant mesdì sun Ciampedie
L Val di Fassa Panorama Music sporc conzerc sa mont apede a refuges, te paisc a Moena e da sera tel Music Club La Grenz. L projet JMMJ fèsc cognoscer gropes e musizisć de lesc de mendranza col sostegn de ApT de Fascia, Region Trentin Sudtirol, Provinzia de Trent, Comun General, Comun de Moena e FPB Cassa. En sabeda ai 22 de aost da les 21:30 a La Grenz la furlana Elsa Martin porta dant sie projet »Vox Humana« e en domenia ai 23 da les 11:30 sun Ciampedie adum con Andrea Ruggeri, Simone Soro e Elia Casu l nef album sard-furlan »Mustras«. Ai 30 de aost da les 18:00 te Piaz de Sotegrava a Moena sarà la »Jugendbigband« del Sudtirol e ai 5 de setember da les 21:30 a La Grenz Letizia Onorati con »Ame­ricas«. En sabeda ai 12 da sera a La Grenz e en domenia da les 11:30 sun Sèn Pele­grin a Baita Paradiso sarà la musega de »Roland’s Puschtra«.
I conzerc é debant, a La Grenz con tessera Arci, program sui social Fassa Panorama Music e La Grenz e su www.fassa.com.


Viver l ambient jà da picoi
L Museo geologich de la Dolomites a Pardac speta i picioi de mercol domesdì con »Baby Geolabs«, per cognoscer la marevees de noscia Tera
Fin ai 9 de setember tel Museo geologich de la Dolomites a Pardac sezion del MUSE, vigni mercol da les 15:00 l é »Baby Geolabs« la proponeta per compagnèr i bec dai 3 ai 6 egn a cognoscer noscia Tera e sie valor.
L percors pea via con letures animèdes en colaborazion con la Biblioteca de Pardac per scutèr stories reèles sun nosc mond fanta­stich e l’atività, de zirca 20 menuc, va inant envian i bec a meter en jech sie sensc per esplorèr l ambient. I pel coscita descorir e co­­gnoscer Gea, noscia Tera e veder coche l era acà mi­lions de egn la Dolomites, con si retii veiores oramai desparii e si minerèi maraveousc.
L’atività à n cost de 3 euro per ogne cobia de bez e gran e 2 euro per ogne familiar gran o picol che se jonta ite. Debant con la Card Insieme o Guest Card de Fiem. L Museo geologich de la Dolomites de Pardac l é avert duc i dis con orarie 10:00-13:00 e 16:00-19:00. Info su www.muse.it; tel. 0462 500366.


Contrada y mit: le tëmp dorm tla pera
En domënia ai 30 d’agost dales 11:00 él sö dal Lech Vërt sön Fanes na manifestaziun particolara, che condüj ite tl rëgn de Fanes, danter contrada y mit
La contrada dla munt de Fanes é liada a mic y liëndes ladines che cunta de n rëgn antich abité dai Fanes, n popul che gnô dales muntagnoles. Les stories de Fanes ne cunta nia de avenimënc che é sozedüs davëi, mo plülere de n’atra verité, belavisa, plü vedla. Söla munt de Fanes pón sintí l’alternanza eterna danter l’imaja concreta dla contrada reala y l’ima­ginaziun dl pinsier che ó fá avarëi sües rajuns. Les stories de Fanes é mic che baia dl mudamënt y dla mort, dl tëmp sacher y dl tëmp profan, ares ne fun­zionëia nia do l’ordin discorsif dla naraziun, ares ti vá indere do al ordin iconich dl pinsier simbolich, ares é imajes che mostra, somi. Ai 30 d’agost dales 11:00 é düc inviá da se senté y se sintí ite te chësc monn. An s’incunta pro le Lech Vërt, cun la prof. Ulrike Kindl y la musiga dl duo »Gota Music«. Sce al ess da plovëi, vëgn la manifestaziun desdita.


Ert & aperitif tl Ciastel de Tor
En jöbia ai 27 d’agost inviëia le Museum Ladin a n domisdé rich de evënc
Dales 16:00 él na vijita menada ala mostra Trienala 2026, por descurí misters y lingaz dl’ert contempo­rana cun Silvia Baccanti. Dales 17:00 incuntada y ciacolada cun Franz Lab y Turris Babel, che pîta na na­­raziun nöia y zënza clichés di raiuns da munt y sües architetöres cun i magazins »Moreness«, »Stüa« y »Turris Babel«. Dales 18:00 inant aperitif acompagné da musiga cun DJ y gran final cun le conzert dl grup pop »Anger« dales 20:00. L’entrada ala presentaziun, al aperitif y al conzert é debann!