La Usc di Ladins

“Ogne meis n viac anter piata biences macèdes de inchioster color emozion, a la descuerta de ensegnamenc, contìes e amisc da tor jù da la coroneles e se portèr tel Cher per semper.“ Con chesta paroles se aur la rubrica “Da la coroneles al cher", che oramai da beleche 2 egn Daniele Verra ge sporc ai letores de La Usc di Ladins.
Chest'outa l joen pascionà de libres ne met dant na proponeta mingol fora de anter.
Pean via dal campionat european de balon che “me à dat zacan l’ocajion de ve meter dant vèlch che èe tel cef da trop: l mond di manga, i picoi ‘fumec’ giaponeisc che i pel esser de desvaliva sort. Chel di manga l’é un di setores maores de l’editoria giaponeisa e de spes l dèsc vita ence a la stories di cartons animé dic tecnicamenter ‘anime’. L’é chest ence l cajo de la storia a dessegnes che ve mete dant anché, Capitan Tsubasa, che seguramenter duc ède vedù sun televijion col titol de Holly e Benji."

Fossa n muie de bela robes da contèr su Capitan Tsubasa - scrif amò Daniele - na storia rica de ensegnamenc che pèrt dal mond del balon per se tramudèr te valores de la vita de vigni dì, chela fata de relazions coi amisc, de sacrifizies per ge jir dò a n ensomech, de familia e dezijions senestres. Ma ve meter dant Capitan Tsubasa, l’é per mie cont n consei avert: chel de ge dèr na possibilità ai manga. Se dijessa che i dessegnes l’é ‘roba da bec’, ma posse ve arsegurèr che ti egn de università é vedù śirèr anter i benc più manga che manuai de linguistica o operes de Manzoni, Ovidio, Shakespeare, Parini…