La Usc di Ladins

Ai 22 de dezëmber à l Aiut Alpin Dolomites abù l prim ntervënt riesc da duman sun Mont de Sëuc, sa la stazion de prim aiut sal Kompatsch: n’ëila cun problems al cuer ne se sentiva nia bën y n ie perchël julei limpea a Bulsan.
Daldò iel stat trëi ntervënc sun purtoies, doi sun Mont de Sëuc y un sun l Jëuf de Ciareja. Te doi caji se tratòvel de scassedes al cë y tl auter de na giama rota - cun dui trëi i pazienc iesen julei a Bulsan te spedel.
Domesdì iesen julei pra l hotel Granvara te Sëlva, ulache na seniëura ne stajova nia bën. Do n prim cuntrol à l’ëila pudù resté te hotel.
Nce ai 23 de dezëmber ie l prim ntervënt stat sun Mont de Sëuc per na atleta jëuna da tlo che fova tumeda cun i schi y se ova fat mel al magon. Do la cures da pert dla duturëssa l’àn ciarieda tl joler y meneda tl spedel de Bulsan.
Domesdì iel stat n ntervënt saniter sun Secëda y riesc do à la zentrela de Bulsan mandà l joler sun Piz Sorega, ulache n ël dla Talia se ova rot na giama. Do che l dutor ti à dat zeche contra l mel iel unì ciarià tl vacum y menà cun l joler tl spedel de Burnech.

De plu tla edizion stampeda de La Usc di Ladins o sun l e-paper a paiament www.lausc.it/e-paper