Te la Piata di joegn Simone Canal, arcedador competent e engaissà che ti ultimes egn l à arvejinà n muion de joegn fascegn al schi ledech, ne conta potenzialitèdes e secrec de chesta disciplina.
Da n trat en ca te Fascia l é na neva realtà sportiva outa ai joegn, che ge dèsc l met a n muie de bec e bezes de se goder, emparèr, se cognoscer. Aon intervistà Simone Canal, arcedador da Vich, per saer vèlch de più en cont de l’evoluzion del ski freestyle fascian.
Simone, contene vèlch de te… Simone Canal Vegne da Valbelluna e me é enciasà a Vich del 2019. É 34 egn. Son stat atlet de schi alpin e de schi freestyle, inant che tachèr mi percors de arcedador per l freestyle del Ski Team Fascia e del Ski College de la Scola Ladina.
Co él nasciù te Fascia l moviment sportif del freestyle? Jà del 2012 con Valentino Mori,
che ades l é un di responsaboi del schi freestyle a livel nazionèl, l era peà via l percors de freestyle del Ski College de Fascia e de gra a so lurier se aea tacà a fèr cognoscer chest sport chiò sul teritorie. Gé é abù la fortuna de ruèr chiò te Fascia del 2019 e de troèr sobito mia lèrga, pissan ensema al Ski Team Fascia de ge sporjer chesta neva proponeta sportiva ai joegn de nesc paijes. L svilup del freestyle fascian l à abù gran sbunf acà trei egn, do la realisazion de l’area de stel ledech che aon chiamà Fassa Gravity, metuda a jir de gra al didament de la Coprativa sozièla Inout, de la familia de Gloria Rizzi de Salin che à conzedù l teren e al sostegn de la Fondazion Caritro e de sponsor del teritorie. Per peèr via, n contribut l era stat dat ence da man de la familia de Gianmarco Sommariva, joen pascionà de freestyle, vegnù a mencèr del 2016.
Podede lejer dut su La Usc dai 8 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)
(Thomas Zulian)
