La Usc di Ladins

Danora, posses'a te prejenté n curt?
Martin Runggaldier Son Martin Runggaldier, é 31 ani, sté a Viena da diesc ani incà, ulache lëure tl ciamp dl "legal tech". Nasciù y chersciù su sons a Urtijëi, daldò sons jit a sté a Maran y a Bulsan per la scola auta. Do l ejam de maduranza éi tëut la dezijion de jì a sté a Viena, ulache é laurà tl ciamp dl film y dl retlam tla televijion. Nce sce fove cuntënt te chësc ciamp, éi tëut la dezijion de jì a studië storia antica, y é laurà per n pez coche tradutëur de papirus tla papirologia de Viena, y ajache la storia antica ie plu pascion ma ne paia purtruep nia scialdi, éi scumencià cun l stude de dërt.

Ntan l stude da aucat, es tëut la dezijion de lauré da prugramadëur. Co pa nscila?
Ntan l stude de dërt laurovi per n nutar y daldò per n aucat, y me é ntendù che, per tan che la teoria dl dërt me savova nteressanta, ne fova l lëur nia avisa chël che ulove fé. Per chël éi scumencià a me nsenië nstës l prugramé. Chësc fova mo dan la nteligënza artifiziela, perchël fova chësc n gran lëur per chël che me tulove dl'aurela belau uni di da sëira do l lëur o l studië. Do n pez me iel unì pità n lëur pra na firma che fej software per aucac y nutares, y nscila pudovi mëter adum mi stude y mi pratica da prugramadëur.

De plu tla edizion stampeda de La Usc di Ladins o sun l e-paper a paiament www.lausc.it/e-paper