La Usc di Ladins

Chesta setemèna i Falcons de l'hockey mender se à trat ite i feres te desvaliva categorìes. A pussèr l'é stat l'U.13, che jiarà chesta sera al Scola de Dèlba l derby ladin de contra al Cortina. En domenia ai 19 de jené, belimpont al Stadie Olimpich de Cortina l'é stat enveze l tornoi U.11 a cater squadres, olache à tout pèrt i falchec fascegn dessema a Alleghe, Zoldo e, apontin, Cortina.
U.15 – Fascia Falcons vs JT Egna/Ora, 19/01/2020
I bec de l'U.15 se à trat ite i feres en domenia ai 19 de jené su la giacia del Scola de Dèlba, olache l'é jit en scena da mesa la does l'endesfida de contra al Egna. 6 a 1 per i ghesć à segnà l tabelon al son de la sirena di 60 menuc, te na partida che é stata aboncont più equilibrèda de chel che i numeres i conta. Tel prum temp l'é ruà i prumes 3 goi aversaries e ence l soul gol fascian segnà da Francesco Pezzei, ma soraldut l burt infortunie per l capitan de la squadra, Igor Cassan, che a zirca 2 menuc da la fin del prum temp l'é restà su la giacia dò l’atach de n aversarie e l'à cognù lascèr l stadie con l'ambulanza: i ejames te ospedèl i à revelà na grieva condizion de la conoia che tegnarà l capitan de la squadra fora per n lonch temp. Ge fajon i miores augures per na bona varijon, che l vegne de outa con la medema determinazion e voa de jièr sia pascion. La partida la é endò tachèda dò na longia paussa, con l'Egna che à segnà etres trei goi per serèr la partida sul 6 a 1.
U.17 – HC Real Torino vs Fascia/Alleghe, 18/01/2020
Ence l'U.17 à perdù sia endesfida chesta setemèna. L Fascia/Alleghe l ge à fat front a la trasferta de Torin. Su la giacia del Palaghiaccio Tazzoli i bec de coach Schenk i à tegnù dur per doi tempes. La pruma doi frazions de jech defat les é states de gran equilibrie, con l resultat de 0 a 0 che no l'é mudà fin al scomenz de la terza. Tel terzo temp l Real Torino à segnà dò giusta 40 seconc de jech con Alessandro Guidi e assist de Gioele Finesi. I doi jiadores se à dapodò baratà l piajer 6 menuc più tèrt, canche Finesi à segnà l secondo gol per i patrons de cèsa, che à fat serèr la partida sul 2 a 0.
U.19 – HCB Foxes Academy vs Alleghe/Fascia, 19/01/2020
A venjer chesta setemèna l'é stat enveze l'Alleghe/Fascia U.19 che à jià la partida de contra a l'Academy de Busan. La formazion vidèda da coach Zanardi l'à troà l vantac jà tel prum temp de gra a la steca de Sebastiano Rossi. Te la seconda frazion de jech l'un-doi de Alfeo Deluca à portà l'enconter sul 3 a 1, con gol aversarie de Dennis Gherardi. Tel terzo temp l'Alleghe/Fascia coegnea se tegnir bon l vantac vadagnà e coscita l'é stat: al gol busanin de Simon Scoz à responet amò Sebastiano Rossi che à fat ite l'empty net gol a 28 seconc da la fin che à serà la partida sul definitif 4 a 2 per i ghesć.

 (Daniele Verra)