La Usc di Ladins

L’é stat n scomenz ezelent per la Tèlia e per i ladins a Narvik, te la Norvegia, olache en sabeda ai 7 de mèrz la competizions di Mondièi Junior de schi alpin é peèdes via con la libera de eles. E apontin te chesta garejèda l’é ruà la pruma medaa per la squadra talièna de gra a la bela proa de Monica Zanoner, che é stata bona de se vadagnèr l terz sciaier del podie tedò da Magdalena Egger e Lisa Grill.

Per la joena de 23 egn da Ciampedel che porta i colores de l’Eserzit l’é stat l prum gran travert mondièl, na bela sodesfazion a pech più che n an dal bel scomenz en Copa Europa del jené 2019 te la Svizra, che ampò no aea bastà a ge fèr vadagnèr na convocazion meritèda ai Mondièi Junior de Fascia, te cèsa, de firé de l’an passà.

A Narvik Monica Zanoner à studià fora delvers l percors ti doi dis de proes e te la garejèda la é stata bona de controlèr delvers la pruma pèrt de la streca per dapò librèr duta sia forza te la seconda pèrt. 

Semper te la pruma giornèda l’é ruà ence n’autra medaa per la Tèlia te la libera de ic, con l’arjent de Simon Talacci da Livigno. La Tèlia e la Ladinia met ades gran speranzes soraldut te Alex Vinatzer te la disciplines tecniches.

L program di Mondièi jirà inant per duta la setemèna e l perveit per anché, domenia ai 8 de mèrz, l SuperG de eles da les 11.30 e de ic da la una. Ti dis che vegn la garejèdes jirà inant con la combinèda, en lunesc ai 9 per eles e en mèrtesc ai 10 per ic, en mercol sarà l slalom lèrch de eles e en jebia chel de ic e en vender l slalom strent de eles e de ic, per serèr sù en domenia ai 14 de mèrz col Team Event.

 (Lucia Gross)