La Usc di Ladins

L'é te la natura de l'om de soraviver ai cambiaments, de jir semper inant zenza abadèr massa a chel che l'é stat dant. E coscita, jà ne somea n'autra epoca, n mond dalonc chel che ne à vedù seré te cèsa zenza la possibilità de meter pe de fora, ruan sencajo forin barcon o sun sèva de usc. Ades, con nesc couribocia podon jir belebon daperdut. No l'é deldut sorì, ma la fasa-2 se à portà demez i burc recorc de la pruma fasa, coscita coche se spera che na fasa-3 descancelarà i scecamenc che sion dò a viver ades.

Ence per l sport la fasa-2 a volù dir »ripartenza«, na parola che oramai ne vegn fora da la oreies. Sessaben chest soraldut ai livìe auc, olache l'é maores enteresc economics: scomenzarà prest l campionat de balon Serie A, l'é stat programà la corses de Formula 1 e MotoGp. Ma enceben zenza manifestazions e garejèdes, n bon mingol de ledeza é ruèda per duc i sportives. Ence chiò te Fascia l mudament l'é stat gran con n bon numer de raides a pe e de corsa, de pedalèdes, rampinèdes e c.i..

N auter setor che à podù endò averjer sie ujes, e chiò vegn più curiosità ajache se trata de sport fat da ite, l'é chel de la palestra. Per chest aon domanà fora Cristian Pellegrin, che dessema a Federika Caviola i tegn la palestra Dolomia Sport de Cianacei. Na palestra averta dal 2014 alò dal zenter Dolaondes, che la conta n bon numer de aboné, ence de gra ai numerousc corsc per la jent che la met a la leta.

"Acà pech temp aede podù endò da nef averjer la palestra, co éla pa ades col lurier? - Ei, aon podù verjer ai 25 de mè, canche l decret ne à dat l met. A la fin i limic da respetar e far respetar l'é chi classics, aon cognù vardar le linie vida e se adatar: per ejempie aon serà i deregoladoes, aon metù i gel per se igienisar... dapodò aon fat jù n planning con le prenotazion, perché più che n tot de persone no le pol star a se alenar tel valif moment. Ge völ che le sie a doi metri canche le se alena, donca noi aon cernù de limitar le persone a cinch a la oita per esser segures che dut vegne respetà e aer segureza".


Lejé duta la intervista su la Usc nr 23 stampèda ai 12 de jugn  (Daniele Verra)