La Usc di Ladins

Per valgugn no l'é stat na neva, ajache l'idea śirèa tel cef de la jent, de bocia en bocia ja da vèlch temp. Ousc de paìsc, invenzion o bujìa da no poder creer ajache »Chi él pa che à dit?«, ma dapodò l'é bastà n comunicat per ruèr al compiment de l'ensomech, de la contìa più bela e fata de emozion: Marco Liberatore l'é l nef head coach del Fascia Falcons.

Mia enciaria tel setor di joegn no la fenesc chiò, à dit Liberatore. Seghitaré con la supervijion ence te la proscima sajon enceben chesta neva endesfida. Son n muie onorà de raprejentar mia val e mia comunanza en pruma persona. L'é na bela endesfida e seguramenter se trata per me del coronament de na cariera. Vegnir de outa dò 20 egn su la panca de la pruma squadra e la vidar da head coach me emoziona, porte duta mia esperienza, son vertech a me tor le responsabilità e ge far front a chesta endesfida dajan l 200% de chel che é!

N augurie l’é ruà dapodò ence dal capitan de la squadra Martin Castlunger, che a propojit de la neva vida di Falcons l ne à dit: »L tolon ite a brac averc! Son content che l nef alenador de la squadra sie na persona de la val e son segur che l farà delvers«.


Articol entriech su La Usc nr 25 stampèda ai 26 de jugn  (Daniele Verra)