La Usc di Ladins

Tel respet de la normes sanitères, la Union Sportiva Monti Pallidi de Moena endreza en vea de Sènta Maria Maor ai 14 de aost n’edizion spezièla de la spazierèda de 6 chilometres a temp »Giro de le Notole«.
La manifestazion sportiva de Moena, che la ciapa vita da 45 egn en ca, la desmostra amò n’outa l’empegn de la sozietà Monti Pallidi per l sport e per sia comunanza. N muie de evenc sportives é stac sburlé per via de la restrizions da Covid ma la Monti Pallidi fin tinultima no volea zeder ajache chest apuntament l’é semper n muie spatà da la comunanza de paisc ma ence da sacotenc foresć che rua a Moena de aost.
Desche i autres egn la manifestazion la é averta a duc, tant ai atlec che ai amatores de ogne età, a gropes e families. Se pontarà demez e se ruarà aló da piaz de Sotegrava. Ma chest an enveze che a grop se pontarà demez un per un, ogne 20 menuc, spartii sun trei fasces: da les 19.00 a les 20.00, da les 20.00 a les 21.00 e da les 21.00 a les 22.00. I partezipanc podarà cerner te che fascia pontèr demez.
Ma fajé prest! La iscrizions cogn vegnir fates online sul sit de la sozietà sportiva dant che vae fora l termin del mesdì di 12 de aost. Ge vegnarà sport n gadget a vigni partezipant e n bon de 10 euro da spener te la boteighes, bares e restoranc de Moena convenzioné con la scomenzadiva.
L paament de l’iscrizion de 15,00 euro e la consegna di numeres vegnarà fac en jebia ai 13 de aost da les 10.00 fin les 12.00 e da les 14.00 fin les 19.00 de fora dal teater de Navalge. L’orden de partenza l vegnarà publicà sul sit de la sociazion e sui social e consegnà a man canche vegn dat fora i numeres de partenza.