La Usc di Ladins

L fin de setemèna passà, ai 24 e 25 de oril, se à serà sù l Gazzetta Challenge TPRA, l torneo de dopie mascolin e dopie mescedà per jiadores tesseré FIT da NC a 4.2 che l’à enaudà la sajon del Tennis Club Moena.

La manifestazion la é stata metuda a jir per la pruma outa, per endrez apontin del TC moenat, ti ciampes del zenter sportif jun Navalge, ben segur tel respet de la normatives anticovid e l’à vedù tor pèrt ben 12 cobies mescedèdes e 11 de ic.

I venjidores del tornoi de dopie mescedà l’é stat Francesco Jellico, da Moena ma tesserà col CT Pardac, che à jià con la joena Sofia Selle, ence ela tesserèda col zircol fiemac, al secondo post se à logà la cobia Consuelo Chelodi e Luigi Pisaniello del Zircol de Ciavaleis.

Per chel che vèrda l dopie de ic la venta é jita ai jiadores de cèsa Franco Bosin e Roberto Crestanello, apontin del TC Moena, che à abù rejon di doi joegn atlec del CUS Trent Miguel Angel Palacio Vilchez e Matteo Spiller. Dò i tornoes regionèi chi che à ciapà più ponc ’power’ va  a la fases de macroarea e inant coscì enscin a le Epic Final de Roma.

L’é stat n fin de setemèna rich de sport e de devertiment, de gra al bon endrez de l’event e ai doi bie dis de soreie che à fat da cornisc, che duc se augura che posse segnèr l scomenz de l’atività sportiva dò la paussa ti meisc de l’invern, enceben la restrizions per l malac.

N gran develpai va a duc i sponsor e i volontadives che con sia desponibilità e sie empegn à fat a na vida che l’event podesse vegnir metù a jir con bon ejit e n rengraziament spezièl va al Tennis Pro de Trent che à dat i pesć per duta does la categories.

 (CRI.M)