La Usc di Ladins

L fin de setemèna passà, ti dis dai 30 de oril ai 2 de mé, se à serà sù tel palagiacia de Trent la finèla del Trofeo delle Regioni, la manifestazion resservèda ai 24 miores resultac per ogne categorìa de fascia Silver (ex fascia interregionèla) tant de artistich che de sincronisà, che se à tegnù a ujes seré, descheche oramai se é usé, per i cognosciui motives sanitères.

A tor pèrt a la competizion, che à vedù l’assegnazion de 27 medaes, l’é stat ence desvalives atlec ladins, anter l’auter con gran bon ejit. Vedon donca coche la é jita.

A sia pruma esperienza a na finèla de campionat nazionèl l’atlet badiot da Colfosch Felix Oberbacher de l’Ice Club Auta Badia l’à tout dant l’endesfida con gran corage e determinazion e l’à otegnù l resultat de ruèr sul sciaier più aut del podie, donca la medaa de òr e l titol de campion talian te la categoria Pre Novice Boys. 

Podie ence per Alessandro Giuliano da Corvara che se à vadagnà l prum post, l’òr e l titol de campion nazionèl te la Basic Novice Boys.

Amò apede, semper te la categoria Pre Novice Boys l’é da registrèr l bel resultat del balarin fascian Giovanni Pezzei de la sozietà Val di Fassa Artistico Ghiaccio Pavei d’Arjent, che l’é ruà sul terzo sciaier del podie e donca l’à podù se meter al col la medaa de bron; te la medema categoria uzon fora ence l 12° post de Marlene Tschaffert (Ice Club Auta Badia).

La balarines badiotes Elena Giuliano e Sara Costamoling à otegnù sie mior resultat ruan respetivamenter 10^ e 12^ te la Junior.

Chesta l’é dassen na bela vida per nesc joenec ladins de serèr sù na sajon de sport e garejèdes che chest an la é stata segur più senestra che zenza per via de la restrizions e i sacotenc stop caujé da l’emergenza sanitèra.

Per chest amò de più de bie complimenc a duc!

 (Cristina Marchetti)