La Usc di Ladins

Le »Ryder Cup« é n torné pro chël che i mius sogadus de golf dl'Europa, afrontëia sü aversars di USA sön le ciamp dl Whistling Straits, a Kohler tl Wisconsin, ti USA. Sön le ciamp Tranrüs da Corvara él gnü metü da jí en domënia ai 16 de setëmber n torné cun la medema formula. I 16 sogadus é gnüs partis sö te döes scuadres: le Team Europe, capitané da Christian Altonn cun Nora Planatscher, Silvio Miribung, Carlo Comploi, Fausto Moscardo, Mattia Davare, Jasmin Costamoling y Renate Pescosta y le Team USA, capitané da Peter Pescollderung, cun i sogadus Elvis Pinter, Carlo Planatscher, Stefan Zingerle, David Comploi, Nicoló Camurri Piloni y i fredesc Michele y Maurizio di Berardino.
Dales 10 é i sogadus piá ia cun la pröma desfida dl de, na competiziun tla formula Louisiana: döes copies se afrontëia y chi che atoca la büja cun manco trates davagna. La pröma proa se á stlüt jö por 4-0 por le Team Europe. Do marëna él gnü desfiré la secunda proa, afrontada da vigni sogadú da su, nia plü en copia. La gara se á destrat fora por döt le domisdé y se á stlüt jö cun la davënta finala dl Team Europe por 9-3.

Le Golf Club Alta Badia stlujará jö la sajun dl golf cun le torné sozial, che ess messü gní soghé ai 19 de setëmber, mo che á messü gní desdit a gauja dl burt tëmp. Le torné gnará bunamënter organisé sön n ciamp foradecá, olache i sogadus messará afronté val' dificolté implü.  (Mattia Davare)