Rita, David y Mattia se cualifichëia
Metü man án le mertesc y le mercui, ai 29 y 30 de merz, cun les gares nazionales de cualificaziun. Le mertesc él sté n slalom lerch. Tla categoria »Jonins-U14« á arjunt le secundo post Mattia Valente dl SC Cortina.
View the embedded image gallery online at:
https://www.lausc.it/sport/19194-la-talia-davagna-le-pinocchio-d-or#sigProId200c7ab469
https://www.lausc.it/sport/19194-la-talia-davagna-le-pinocchio-d-or#sigProId200c7ab469
Le de do, mercui ai 30 de merz, él gnü desfiré n slalom strënt. Chiló s'á alzé fora i dui badioc: David Castlunger s'á plazé al 2. post y Rita Granruaz é rovada 3. Insciö s'á i dui cualifiché por les finales internazionales. Tl slalom strënt él ince ciamó da recordé le bun 6. post dl atlet dl SC Gherdëina Christian Kostner. Suen Fiorot y Thomas Liberatore (ST Fascia) s'á plazé al 20. y 21. post. Agnese Pais Bianco y Giulia Alverá dl SC Cortina é rovades al 16. y 18. post.
La Talia davagna le Pinocchio d'or
Inant éra jüda vëndres y sabeda cun les gares internazionales che á cherdé adalerch atletes y atlec da döt le monn. Ince chiló á i ladins fat de bunes prestaziuns: Rita Granruaz é rovada 4. tl slalom strënt y 6. tl salom lerch. So compagn de scuadra, David Castlunger, s'á plazé al 8. post tl slalom strënt y al 10. tl slalom lerch. Mattia Valente dl SC Cortina á davagné le slalom lerch tla categoria »Jonins-U14«. Insciö á le Team Italia A concuisté le Pinocchio d'or y ince le »Trofeo Giancarlo Guidi« sciöche miú naziun dl 2022. (kp)