La Usc di Ladins

»Pinocchio sugli sci« é rové a süa 40ejima ediziun y por les finales él rové adalerch passa 1800 atletes y atlec da döta la Talia y da döt le monn. Les gares nazionales de cualificaziun é stades le mertesc y le mercui, ai 29 y 30 de merz. Por les finales internazionales, che é spo stades le vëndres y la sabeda, s'á cualifiché dui ladins: David Castlunger y Rita Granruaz, trami dl ST Alta Badia. Cualifiché s'á ince Mattia Valente, che garejëia por le SC Cortina.

Rita, David y Mattia se cualifichëia
Metü man án le mertesc y le mercui, ai 29 y 30 de merz, cun les gares nazionales de cualificaziun. Le mertesc él sté n slalom lerch. Tla categoria »Jonins-U14« á arjunt le secundo post Mattia Valente dl SC Cortina. Bun 7. post por Philip Ploner dl SC Reba. Thomas Liberatore de Fascia é rové 15. y Christian Kostner de Gherdëna 16. Tla categoria feminila é Emma Panizzuti (SC Cortina) rovada 4., süa compagna Marianna Zandegiacomo Caneva é rovada 10. Pro i maius, dla categoria »Aliefs-U16«, 5. post por Annika Rose Johansson, 7. plazamënt por David Castlunger y 9. post por Rita Granruaz dl ST Alta Badia. Camilla Vanni dl SC Col Druscié é rovada 10. y Giulia Alverá dl SC Cortina 16.
Le de do, mercui ai 30 de merz, él gnü desfiré n slalom strënt. Chiló s'á alzé fora i dui badioc: David Castlunger s'á plazé al 2. post y Rita Granruaz é rovada 3. Insciö s'á i dui cualifiché por les finales internazionales. Tl slalom strënt él ince ciamó da recordé le bun 6. post dl atlet dl SC Gherdëina Christian Kostner. Suen Fiorot y Thomas Liberatore (ST Fascia) s'á plazé al 20. y 21. post. Agnese Pais Bianco y Giulia Alverá dl SC Cortina é rovades al 16. y 18. post.

La Talia davagna le Pinocchio d'or
Inant éra jüda vëndres y sabeda cun les gares internazionales che á cherdé adalerch atletes y atlec da döt le monn. Ince chiló á i ladins fat de bunes prestaziuns: Rita Granruaz é rovada 4. tl slalom strënt y 6. tl salom lerch. So compagn de scuadra, David Castlunger, s'á plazé al 8. post tl slalom strënt y al 10. tl slalom lerch. Mattia Valente dl SC Cortina á davagné le slalom lerch tla categoria »Jonins-U14«. Insciö á le Team Italia A concuisté le Pinocchio d'or y ince le »Trofeo Giancarlo Guidi« sciöche miú naziun dl 2022. (kp)