La Usc di Ladins

Chesta l é na setemèna piena per l schi a Fondo Grande de Folgaria, olache l é en cors l’Alpecimbra FIS Children Cup, competizion nasciuda del 1957 desche Trofeo Topolino che dal 2017 à chest nef inom col endre de schi club TTS, APT e Ski Team Polisportiva Alpe Cimbra.

Passa 400 joegn Allievi e Ragazzi selezioné da 18 Comitac de duta la Tèlia se à jià fora ai 23 e 24 de jené la partezipazion a la fasa internazionèla. En lunesc l é stat l slalom lèrch per i U14 sul portoi Agonistica enveze i U16 se à sproà anter i pèi strenc su la Martinella Nord, l dì do la categories à garejà a la reversa, col strent per i Ragazzi e l lèrch per i Allievi.

Te la pruma giornèda l é ruà doi medaes de bron per i ladins: tel slalom lèrch di Ragazzi con Matthias Mahlknecht, joen clas 2009 del SC Gherdëina Raiffeisen e tel strent de le Allieve con Darotea Mobiglia, da Varese ma enciasèda te Fascia e alteta del Ski Team e Ski College de val. En mèrtesc Matthias Mahlknecht l é ruà al or, e medemo gran ejit à abù l badiot David Castlunger ti U16.
Do l team event de mercol e la zerimonia de inaudazion de jebia, ai 27 e 28 de jené chisc 3 atlec tolarà pèrt a la fasa internazionèla olache l é 45 squadres da 40 nazions de duc 5 i continenc

De più, con la classifiches di etres ladins, su La Usc stampèda de vender ai 27 de jené. 

 (Lucia Gross)