La Usc di Ladins

Chesta setemèna n muie de formazions fascènes é jites su la giacia. Enceben la desfates e i 0 ponts en classifica vadagné, no l é dut zomp. Da la bela prestazion de l’U.19 ai bogn resultac de jech di falchec più picoi. Se pel vardèr inant con otimism.

I più picoi falchec à passà dassen n bel fin de setemèna. Gran festa per le U.7 e 11 che à jià en domenia ai 29 doi tornoes da peconc. L’U.7 à jià a la quinta giornèda ofizièla del calandèr trentin a Perjen, n tornoi a 4 squadres dessema ai patrons de cèsa, l Piné e l Fiem. Desvalives genitores à podù ge jir do a la squadra con na bela festa su la tribunes, olache se à vedù ence n salut di Ultra del Perjen a Arianna Sittoni, la joena alpinista morta sot la levina del Lagorai ai 24 de jené e che la era trop cognosciuda a Perjen olache la lurèa. L’U.11 enveze à jià a Trent n tornoi a 3 squadres contra Trent e Perjen. Dut é jit ben e do la fadies i bec à podù magnèr la pasta dessema a si compagnes e amisc aversaries ti bar di doi stadies trentins.

De più su La Usc stampèda de vender ai 3 de firé.  (Daniele Verra)