La Usc di Ladins

En vender ai 24 de firé se à dejout la 3^ tapa del Trofeo Montura SkiAlp 4 valèdes. I atlec é peé via dai 1450 metres del zenter de Sèn Martin de Castrozza, da la Piazzetta Crodaroi, per jir su fin ai 1965 metres del Refuge  Colverde per la corsa a cronometer 24° Memorial Maurizio Zagonel e 3° Trofeo Aldo Giovanelli, sun 3365 metres de svilup con 515 m d+. 

Do aer vent la pruma tapa del 4 valèdes, la Ski Alp Cauriol stata ai 3 de firé, l atlet de Gherdena Alex Oberbacher se à desmostrà amò n’outa l più asvelt a jir con la pouses su per la ertes. L schialpinist del 1994 scrit ite col Team La Sportiva l à stat 20 menuc e 22 a ruèr sunsom. Al secondo post Daniele Felicetti, fiamac del 1996 del Team Dynafit te 21’26 e 3° l fascian da Dèlba Gabriele Depaul, clas 1988 che cor per l’ADS Cauriol, ruà demò 2 centeisemes do te 21’28 e che aea venta la seconda tapa, l Moena Ski Alp ai 10 de firé.

Per chel che vèrda la eles a Sèn Martin la venta é jita a la svedeisa Tove Alexanderson col temp da no creer de 24’38 e l 18° post ssolut; la fascèna Giorgia Felicetti del Ski Team Fascia, che aea vent la pruma tapa del Trofeo 4 valèdes, se à vadagnà l arjent de eles dedant da Kristel Mottin de Bela Ladinia e da la badiota Heidi Dapunt de Badia Sport, che se à vadagnà l or te la categoria Over 50 feminina. Te l'ultima tapa en vender podarà esser na bela batalia per l Trofeo 4 valèdes. Iscrizions sul sit  https://keepsporting.com.

De più su La Usc stampèda de vender ai 3 de mèrz.  (Lucia Gross)