La Usc di Ladins

L é stat l Palacongresc de Andalo a ge dèr alberch chest an a la tradizionèla Festa del Sport che l Comitat Trentin de la FISI endreza per serèr su la sajon agonistica da d’invern rengrazian atlec, arcedadores e sozietèdes per si resultac, che fèsc stolz nosc teritorie.
Chest’outa Fascia la é stat protagonista per dut l event per l tribut che ge é stat resservà al gran campion da Poza, che con chesta sajon à serà su sia longia cariera agonistica: Stefano Gross.
Chel de Sabo l é n ejempie emportant de pascion, coraje, costanza e determinazion a no molèr mai e a saer ge fèr front e tegnir poz ence ai problemes, ai azidenc, a la delujions che ampò tel mond del sport no mencia, apede ben segur a la gaissa e la sodesfazions de canche dut va al miec.
Per chest no podea esser testimonial più giust da ge portèr dant ai picoi atlec che à scomenzà via sie percors agonistich e i à arjont i prumes resultac de valuta.
Chisc picoi, ma ence i atlec più gregn, i dirigenc e i tecnics ge à fat a Gross lonc e forc batimans, soraldut canche sul video se à podù veder sia maraveousa venta en Copa del Mond a Adelboden del 2015 e canche l president de FISI Trentin Tiziano Mellarini, ensema con l assessor provinzièl Roberto Failoni, ge à consegnà a Sabo l pest a la cariera, recordan sie ultim suzes, l 5° titol de campion talian assolut de slalom strent, vadagnà proprio te Fascia chest an ai prumes de oril.
Apede al Pest ITAS a la cariera e al titol de campion talian, de Gross te chesta sajon l é stat recordà per ence i 5 piazamenc TOP 20 concosté en Copa del Mond o Mondièi. Ades sia cariera jirà inant tedò la paladina, desche arcedador de sie Grop Sportif, le Fiamme Gialle.

Su La Usc nr nr 20 dai 30 de mé l é ence i etres fascegn permié: podede lejer dut sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.





 (Lucia Gross)