La Usc di Ladins

L’à 15 egn e la vegn da Sestola, tel comun de Fanano (MO)  ma la é cresciuda sportivamenter tel Ski Team Fascia e l é na atleta del Ski College de la Scola fascèna. 

Rejonon de Flora Tabanelli, che te la Neva Zelanda chisc dis passé l’à arjont n resultat da marevea: l é stat defat la pruma talièna a doventèr campiona mondièla junior tel freeski park&pipe.

Flora aea jà desmostrà sie valor te la sajon passèda, seran su al prum post te la classifica generèla de Copa Europa de freestyle ski olache l’aea fat 5 podies, 3 sul prum sciaier, tant te garejèdes de slopestyle che de big air, e la se aea vadagnà ence l titol talian de slopestyle a Plan de Corones.

Con chisc bie resultac chest istà l’à arjont l post tel Zenter sportif del Eserzit e la convocazion per i Campionac mondièi junior de freestyle ski che se à dejout a Cardrona dai 28 de aost ai 3 de setember.

Apontin da l’autra pèrt del ozean ca l é ruà la bela neva per la joena atleta, oramai fascèna de adozion desche sie fra Miro, ence el cresciù tel Ski Team e Ski College de Fascia. E se Miro jai 2 egn a Krasnoyarsk te la Russia l era stat bon de arjoner l bel resultat del bron mondièl, chest’outa sia sor te la Neva Zelanda à fat amò miec.

De più su La usc stampèda de vender ai 8 de setember.  (Lucia Gross)