La Usc di Ladins

L prim turno à Erwin Tröbinger y Patric Prinoth venciù n lunesc contra Gabriel Moroder de Urtijëi y Kilian Dallapiazza de Corvara, cun l resultat de 6-2, 6-4. I cherc de finela ëssi messù jughé dantier mierculdi contra i taliani Leonardo Rossi y Luigi Sorrentino, numeri un dl tabelon dl dopl. Ma un di doi jugadëures se à fat mel, y nsci à l pèr arbandunà l turnoi. Chësc à purtà Tröbinger y Prinoth tla semifinela de inier juebia da sëira contra i taliani Andrea Colombo y Leonardo Malgaroli. Nce chësc pèr ie ruvà tla semifinela tres n chert de finela nia jugà – tl lingaz dl tennis ti dìjen walkover – contra i numeri trëi dl dopl, Federico Bondioli y Fausto Tabacco. La semifinela à durà n'ëura y caranta menuc, do n prim set perdù dai ladins per 6 (6)-7. L segondo set se ài davanià per 7-5, ma tl terzo ne ti iela danz nia jita fata, y à perdù 10-7, do n juech jugà bën ma cun vel' ucajion sprecheda ti mumënc dezisifs. 

Ti cherc de finela dl singul à l tudësch Adrian Oetzbach batù l talian Lorenzo Rottoli, Giovanni Oradini à batù l cunnaziunel Leonardo Malgaroli, y l austriach Sandro Kopp à batù l talian Alessandro Pecci. Stefano Napolitano – l favorit per la vënta finela – à venciù contra l cech Hynek Barton. Ncuei vënderdi saràl tl zënter dal tennis de Sëlva, dala 13:00 inant, la finela dl dopl, cun Colombo y Malgaroli che jugherà contra y tudësc Lemstra y Zahraj, y la doi semifineles dl singul, cun Oetzbach contra Oradini y Napolitano contra Kopp.

Bruno Maruca