La Usc di Ladins

L fova na partida sun chëla che duc se ncunfertova. L Gherdëina y l Ahrntal se fajova ta Mulin da Coi ora l prim post te tlassifica dla prumozion. Y coche n se l à aspiteda, nscila iela nce stata: na partida scialdi cumbatuda cun ala fin n resultat che premieia l Gherdëina per 1 a 0, na vënta strënta ma meriteda. 

L prim tëmp: de bona ucajions per tramedoi la scuadres
La scuadra de cësa ie pieda via cun n drë' sbunf: bele tl 18ejim menut à Walid abù la prima bona ucajion dl juech, ma si trata da feter 20 metri ie jita sëura la porta ora. Bele riesc da dedò se à l Ahrntal lascià udëi, ma l verdaporta dl Gherdëina Lukas ie stat bon de fermé su l palé. L juech ie jit inant cun ucajions per tramedoi la scuadres: tl 37ejim menut à Volino da na bona posizion falà ju de puech y doi menuc do fòvel pona inò da se temëi da chëi dl Ahrntal, cun na trata tla porta fermeda su a puntin da Lukas.

L gol al 88ejim menut
Do la paussa iela jita inant cun la doi scuadres che ne sparaniova nia y se purvova dassënn. L gol dla vënta per l Gherdëina ie mpermò ruvà tl 88ejim menut: do che l verdaporta dl Ahrntal à pià su na trata de Volino à l Gherdëina pudù tré n corner. Michael Perathoner à tucà de cë y trat ite la codla tla rë: 1 a 0 per l Gherdëina y na gran festa per i fans che fova a cialé pro. Daldò à nce mo l Ahrntal abù na bona ucajion, ma l ne n'ie plu stat nia da fé.

Na vënta che ie merit dla gran lezitënza y ulentà d jugadëures dl Gherdëina y che ti porta trëi ponc y l prim post te tlassifica ala scuadra ladina. 

EK