La Usc di Ladins

Mete man a la delibera nr 210 dl  27.01.2003 dla Provinzia de Bulsan sun l'adoranza dl lingaz ladin tl'aministrazion publica, che ova decreté desche lingac ofiziai tl Sudtirol, dlongia a todesch y talian, demé les does variantes gherdëina y badiot unitar. Chest l vare damané da trueps tl curs dla scontreda dal titul »Cie é pa n standard te n lingaz? Storia, endesfides, aspetatives y davegnì dl ladin«, metuda a jì en vender ai 6 de jugn a Sèn Jan dal Istitut Cultural Ladin de Fascia en colaborazion con la Region Trentin Südtirol, l Departiment Istruzion y Cultura ladina dla Provinzia de Bulsan y i Istituc Ladins Cesa de Jan y Micurà de Rü. Na giorneda de referac y confronc a chela che à tò pert na lingia de reprejentanc politics y istituzionai y de persones che adora profescionalmenter l ladin vigni dì, da dutes les cinch valedes dolomitiches.
Mete da nuef sun meisa la endesfida de n lingaz ladin tet, na koiné scrita per duc i ladins, fova dassen la vida mioura per l Istitut Majon di Fascegn per festejé si 50 agn: l projet dl Ladin Standard (o Ladin Dolomitan) fova vegnù defati porté inant con forza jà ti agn '90 dal Istitut Ladin de Fascia, adum con l'Union Generela di Ladins dla Dolomites. Sce chel projet é jù a se perde, y al é vegnù porté inant demé con scomenciadives sot ega via, é la majera gauja belapontin la delibera scrita de soura.

Se pel lejer dut su La Usc nr 22 dai 13 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.



 (Lucia Gross)