La Usc di Ladins

»Dal pont de ududa di resultac ne n’à l’ultima sajon nia butà«, chël à l presidënt Walter Ploner nce dit te na maniera drët tlera. N à cumprà ite i fauz furesć y la scuadra ne n’à nia purtà l resultat che n se aspitova. Miec iela jita dal pont de ududa di scioldi y di fans. N ie stac boni de smendré l debit che n ova fat l ann dant, n debit che ie śën ntëur ai nuvanta mile euro. La lia manejea scioldi de passa mez milion. Danter la prima scuadra y dutes chëles di jëuni ruva adum truep custimënc che n cëla uni ann de curì cun spon­sëures, cuntribuc y sambën nce cun la chertes y la ntredes che fova l inviern passà deplù dl solit. Mpurtantes fova nce duta la festes che la lia à metù a jì y tlo à l presidënt ulù rengrazië dassënn duc i ulenteres che ti à for judà y i Chemuns y la Lies dl Turism che ti à dat l mesun de les fé.

SPM

L articul tla edizion atuela de La Usc di Ladins.