Gaetano Rasom, stat per egn jiador de hockey, l se à tout su l’encèria maora, ciapan la redenes de la sozietà che l vel portèr inant con n staff de colaboradores, con Roberto Ongari che resta vizepresident.
Gaetano Rasom de Onz, 64 egn da Pera, l é l nef president del Hockey Club Fassa Falcons. L aon intervistà per saer vèlch de più en cont de chel che vegnarà portà dant ti egn a vegnir tel moviment hockeistich fascian, co la spenta e le prospetive de la neva aministrazion.
President, contene mingol de coche la é nasciuda chesta neva aventura… Gaetano Rasom L é n percors envià via da dotrei egn con n grop de pascioné, che adum à palesà soa volontà de portar n contribut de idee e neva gaissa al ambient del hockey fascian. Soraldut ti ultimes meisc se aon troà per se confrontar e meter ensema idee e projec inovatives, con chela de proar a ge jir encontra a la jent, ai joegn e ence
ai atlec più esperc, che domanaa aria neva. Se aon metù en jech per ruar a ge dar nef luster e valor a n moviment sportif e sozial, che amò te noscia comunanza soscedea enteres e partezipazion. Ensema a Donato Scola e Alessandro Carpano se aon jontà ite tel Consei de aministrazion del HC Fassa co la volontà de colaborar più che l é meso con chi che à ret la sozietà ti ultimes egn. Fora per l invern passà aon metù a post duta la part burocratica e de secreteriat, nia sorida, ajache per coche l é l hockey te Fascia, l livel de profescionalità domanà l é muie aut. Ades man a man l’idea l é chela de lurar coi sozi veies e neves per meter adum n bel grop de persone ative, che à voa e gaissa de crescer. Ti meisc che vegn, con chi che ge creit, volon far na recapitalisazion de la sozietà, per aer te man na realtà sana, forta e vertia per sgolar.
Se pel lejer dut su La Usc nr nr 20 dai 30 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper. (Thomas Zulian)
