La Usc di Ladins

Te Sëlva iel stat na tapa dla seria de garejedes de Copa dl Mond de roda da mont UCI: la HERO Dolomites Südtirol. Dut fova scicà su y njenià ca per chësta gran manifestazion duta tl sëni dla roda. L fova trëis dis plëns de busiamënt, rodes y ntratenimënt ora per la stredes dl luech. N audiva rujenan truepa rujenedes desfrëntes, l ie unit adalerch jënt da dlonch caprò. Mëndri, granc, atlec y de tei che va cun la roda te si tëmp liede y duc canc cun un na gran pascion: la roda. Y n unëur de chësta ucajion fòvel pitedes de curnisc de uni sort coche paracadutisć, muderadëures, bandieres, autoriteies, tepih cueceni, stonc, festes cun mujiga y d’autra zelebrazions a livel soziel. Per i apasciunei y l’apasciunedes fòvel propi l »place to be«, la drëta luegia da vester.

De ndut àl fat pea belau 3.000 persones da 46 paejes desfrënc. Pra i prims diesc resultac dl’ëiles iel reprejentedes
sies nazions desfrëntes, pra i ëi ot. La Hero àn mustrà te televijion de 106 paejes desfrënc. L fova trëi trasses da fé: chëla de 86 chilometri y 4.500 metri de deslivel, chëla de 71 chilometri y 4.100 metri de deslivel y chëla de 60 chilometri y 3.200 metri de des livel. L start y l travert fova dan plaza Nives te Sëlva. Pra la trasses desfrëntes jìvela de furné sëura jëufs
y raions dl’autra valedes ladines ntëur al Mëisules.

Julia Lardschneider

Di resultac dla garejeda, dl pest de sustenibltà, dla HERO Kids y dl prugram curnisc drët rich pudëis liejer tl'edizion nueva de La Usc che vën ora chësc vënderdi ai 20 de juni.