La Usc di Ladins

Dai 22 ai 27 de jugn Fascia sarà endodanef protagonista de la Val de Fascia Running che chest an vegn endrezèda sot l ciapel de la sozietà Gregn Evenc con l responsabol Diego Salvador. Cinch giornèdes de garejèdes de corsa a pe per n total de 55 chilometres olache se endesfidarà profescionisć e amatores anter i paijes de la val e i ciantons più bie. La desvaliva tapes defat no sarà demò per i runners ma ence per i pascioné de nordic walking che podarà les fèr con sie ritm e i bachec. I atlec podarà fèr duta cantes la garejèdes o ence demò una o doi.
La pruma tapa é a Moena en domenia ai 22 de jugn e la é stata metuda ju da Erwin Chiocchetti; l'ultima tapa en vender ai 27 de jugn da Poza fin sa Bufaure su n percors metù ju da Simone Manfroi e da sera te piaz Marconi de Cianacei vegnarà fat la premiazions con la zelebrazion di atlec protagonisć de la cinch frazions, la consegna di recognoscimenc individuèi e de squadra e la ejibizion del Grop Folk de Cianacei.

Se pel lejer dut su La Usc nr 23 dai 20 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (MCI)