La Usc di Ladins

La Copa Europa Lead Senior de rampinèda endrezèda a Ciampedel ai 21 e 22 de jugn l é stat n gran suzes de sport e de publich. L Val de Fascia Climbing, col sostegn de la FASI, la Federazion de la rampinèda sportiva, à endrezà la palestra ADEL con i desvalives percorsc de gara, de gra ai tecnics de la Federazion e ai sacotenc volontadives che se met semper a la leta.

I doi dis ge à portà ben al team talian de ic e de eles. La supercampiona romana, che stèsc a Trent e la é scrita ite a le Fiamme Oro, Laura Rogora, la é ruèda sul sciaier più aut del podie, desche da pronostics, e l mantovan de 17 egn Riccardo Vicentini l se à vadagnà la terza posizion.

Per la sociazion Fascia Climbing n’autra bela sodesfazion per l endrez ezelent de la garejèdes e per la val segur na bona vedrina de la calità de la strutures e del bon azet di sportives: 115 concorenc en raprejentanza de 25 nazions. Gran content é stat palesà da la responsabola del endrez Alison Prinoth del Val de Fascia Climbing: »Ades podon se pussèr mingol con la sodesfazion de duc i complimenc che aon ciapà. N fort develpai al staff e a la trentina de volontères che fèsc pèrt de la sociazion con la speranza de fèr crescer l moviment di joegn tel mond de la rampinèda sportiva e de ciapèr amò ence n auter event internazionèl, magari de livel amò maor.«

De più su La Usc stampèda de en vender ai 27 de jugn del 2025.



 (Monica Cigolla)