La Usc di Ladins

»Per me ‘fin de vita’ no l é la paroles giustes: la mort l é l compiment, no la fin de la vita.« L lo à dit l piscop de Trent Lauro Tisi en jebia ai 21 de aost, te la scontrèda dal titol ‘Il coraggio di una scelta’ te teater del oratorie de Poza, al ultim de la lingia de apuntamenc de chest an de ‘Ispirazions d’istà’.

Don Lauro, descheche el enstes à dit foraldret, l volea vardèr la delicata costion metuda chela sera sun desch da n pont de veduda uman più che religious, da persona e no da preve o piscop. Sia paroles, aproèdes ence da etres reladores, à mingol utà sotessora la prospetiva e metù al zenter chel temp, lonch o curt che l sie, canche na persona sà che la cogn se n jir, n temp de spes tant rich, per la persona enstessa e per chi che ge stèsc apede, da restèr desche l don più bel de la vita »n temp che ne dèsc perles de umanità«.

Chela sera de la rassegna che da 16 egn la Comiscion cultura de la parochies de Fascia ge sporc d'istà a fascegn e ghesć, era nasciuda soraldut per rejonèr de la normativa sul ‘fin de vita’, do che la Cort Costituzionèla à dit foraldret che l é besegn de na lege chièra, per chest l prum relador envià l é stat l senator Alfredo Bazoli, prum firmatarie de na proponeta de lege su la ‘mort assistida medicalmenter’. De chest ben segur l é stat rejonà, ma l confront, moderà a na vida competenta e ascorta da Andrea Rizzi, à metù dant n muie de più, col contribut de duc i reladores. Apede a Bazoli e al piscop Tisi l é stat envià ence l professor Stefano Semplici, ordinarie de etica sozièla a l’Università de Roma Tor Vergata e Luca Manfredini, pediatra che al ospedèl Gaslini de Genova l se cruzia de cures paliatives per i mendres tel hospice ‘Il Guscio dei Bimbi’.

Se pel lejer dut su La Usc nr 33 dai 29 de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.





 (Lucia Gross)