La Usc di Ladins

Nosc sfoi se à jà cruzià del argoment con n aprofondiment su na piata entria publichèda sul numer 31 di 14 de aost. Ades ence l’ApT de Fascia tol posizion con n comunicat: enlongia la strèdes di jouves l é n gran numer de auti e camper che se ferma de net, chest crea dan per l ambient.

I é 2.389 i posć per i auti, anter i spiac (en dut 235) e i piazai no a paament su la strèdes che porta sui jouves de Fascia. 2.979 l é en dut i posć per i auti, de chisc 590 a paament, ti cater piazai anter Sèn Pelegrin, Mont de Vich e Pordoi. N muie de chisc spiac (olache no l é asfalt ma demò giara o erba), soraldut de net, vegn duré per l camping. Se rejona de arees no atrezèdes, zenza cesci, bidons per la scoadies o festii, che tel temp de sajon se empienesc de camper o mesi camperisé e a chesta vida vegn sostegnù n comportament dalonc dal turism sostegnibol e respetous del ambient che alincontra auza fora la val. Coscita scrif l’ApT de Fascia tel comunicat manà fora enstadì. L’Azienda la é do che la tol su dac sui passajes di mesi che viaja sun stradon e su la strèdes per ruèr sui jouves e via per chesta setemènes passèdes l à fat ence na mapadura di spiac, di posć per i auti e di auti che vegn lascé ju de net, con soralesc de messèl e de aost dant da les 7 da doman bonora.

Se pel lejer dut su La Usc nr 33 dai 29 de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (MCI)