La Usc di Ladins

Pra i pasciunei de aeromodelism iel doi sort de persones: chëi che sta gën te berstot a mëter adum y fé do i julieres o joleri y chëi plu nteressei a jì a julé cun si model radiocumandà. L ie doi pertes dla medema bedaia, dla medema pascion. Na pascion che n à pudù udëi y sentì n dumënia passeda ora a Albions pra la festa dl jol. L fova la setima edizion de chësta festa metuda a jì dala lia di Curnacins, la lia di modelisć de Gherdëina, deberieda cun i Destudafuech de Albions. "Uni iede se mpensons: Saràl pa mo mesun fé deplù? Y uni iede iel velch de stramp. La streda da Tluses su fova chëst ann mpifeda de auti. L ultim iede dan trëi ani àns lerch per siescënt auti, chëst iede nen fòvel otcënt", nes à dit l presidënt dla lia di Curnacins Ivo Demetz de Sëlva. La sudesfazion do la festa ie granda, dut à butà y degun ne se à fat mel. Nce chël ie uni iede mpue n cruzi, canche n mët a jì velch tan de grant.

Elisabeth Kostner

L articul tla edizion atuela de La Usc di Ladins.