La Usc di Ladins

La neva ruèda enstadì dal mond del schi somea serèr su la longia sajon che à vedù Fascia protagonista del slalom mondièl: Federico Liberatore lascia l agonism.
La longia e gloriousa sajon del slalom fascian era peèda via jai 20 egn col moenat Cristian Deville, a chel che se à jontà ite de fata Chiara Costazza e dapò Stefano Gross da Poza. 
Deville e Costazza i à lascià la cariera agonistica, l prum del 2018 e la seconda del 2019, restan tel setor tecnich del schi te si Gropes melitères, respetivamenter le Fiamme Gialle de la Finanza de Pardac e le Fiamme Oro de la Polizia de Moena. A la fin de la sajon da d’invern passèda ence Gross l à anunzià de lascèr l mond agonistich e l à metù temp, pascion e competenzes tel grop sportif de la Finanza, ma ence te la familia, ajache chisc dic passé l é doventà père.
Ades, pec meisc do, se à slarià fora la neva che ence Federico Liberatore à tout la dezijion de arbandonèr l agonism.
Apede a chest l é da recordèr ence n’autra neva del mond del schi che revèrda Fascia, chest’outa tel setor tecnich, con Stefano Costazza da Poza, stat per n muie de egn responsabol de la nazionèla de slalom lèrch e strent, che l à lascià la Fisi e l é jit te la Slovenia, olache l ge starà do en particolèr a la preparazion de l’atleta Andreja Slokar per la Copa del Mond de slalom. Dut chest en vea de la Olimpiades, che condiziona duta la organisazion del mond sportif nazionèl.

Se pel lejer la intervista a Federico Liberatore su La Usc nr 25 dai 4 de messèl: l sfoi stampà l é ence te la boteighes de sfoes de la valèdes ladines.




 (Lucia Gross)