La Usc di Ladins

Sot a n cil valgamia curí ite é incö piá ia dales 6:30 da La Ila i partezipanc dla Maratona dles Dolomites-Enel 2025. Chisc s’á sfidé danü sön i trëi percursc preodüs por chësta 38ejima ediziun: chël maiú de 138 chilometri y 4230 metri de deslivel; chël mesan de 106 chilometri y 3130 metri de deslivel, y chël plü cört de 55 chilometri y 1780 metri de deslivel. Te chësta ediziun, dedicada ala tematica »Lüm«, á druché i pedai deboriada amaturs, sportifs y atlec, don vita ala bisca dinamica co é passada fora por i jus dolomitics.

A stlü jö le percurs lunch sciöche pröm é sté le talian Luca Cavallo, che sön la trata plü düra, chëra dl Giau, á apié le spagnol David Mayo ti sciampan dant. Cavallo á passé fora le travert a Corvara cun n tëmp de 4:25:40,2 y ma 2.32 menüc dan da David Mayo, che á arjunt le seundo scalin dl podest. Defata é rové ala fin dl percurs l'atlet talian Giuseppe Orlando, che en chësc iade á messü s’acontenté dl terzo scalin dl podest, do s’avëi porté a ciasa la devënta l’ann passé. 

N podest daldöt talian él garaté tla categoria feminila, te chëra che l’atleta Roberta Bussone á dé dant le ritm da atira. Ara á pedalé dancá tres le percurs lunch, lascian tröpa lerch danter ara y les atres partezipantes. N cher’d’ora plü tert é rovada al travert Martina Cavallo y defata l’atleta dal Südtirol Carmen Moser.

Franz Wieser de Badia á arjunt l'8. post cun n tëmp de 4:35:11,8, stlujon jö la competiziun sön le percurs lunch 9.31 menüc do da Cavallo.

Tröpa lüm sön i podesć á porté dantadöt le sorí di atlec plü asvelc, co á podü festejé deboriada le travert arjunt.
 


Deplü da lí ciafëise tla proscima ediziun de vëndres, ai 11 de messé!