La Usc di Ladins

Fin de setemèna de gran sport te Fascia en sabeda ai 12 e en domenia ai 13 de messèl con la DoloMyths Run 2025, l event sportif sot l ciapel de la sozietà Gregn Evenc de Fascia col coordenament del president del Comitat de endrez Diego Salvador. La doi garejèdes che à avert l event sportif, la Trail de 42 chilometres e la 12K, les é states dominèdes da atlec neves respet al an passà e te trei ocajions i à batù l record de dant. Prestazions autoritères e ventes spetacolères per l atlet da Macerata Giacomo Forconi del Team Fessura che à serà su sia maratona de 42 chilometres con l nef record de 3h57’06’’ e anter eles per Camilla Rizzardi del Team Salomon che à enveze fermà l cronometer sul temp de 4h53’06’’.
La 12K l é stat na garejèda de gran velozità. Al travert sun Fedaa l é ruà per prum Isacco Costa col temp de 57’05’’, 1’28’’ dant del agordin Luca Cagnati, terzo l atlet da Gherdena, venjidor de l’ultima edizion, Samuel Demetz a 4’08’’ e quarto l fascian Mauro Rasom a 4’35’’.
La fin de setemèna rica de sport de Cianacei se à serà su en domenia con la DoloMyths Run Skyrace con desvalives resultac da uzèr fora anter chisc l prum podie del gherdener Alex Oberbacher de Gardena Runners.

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (Monica Cigolla)