La Usc di Ladins

L é presciapech n an che la neva sociazion Kino à tout en gestion l Teater Chino Marmolèda de Cianacei, strutura con gran potenzialitèdes che man a man, de gra a la idees e al lurier del nef grop de lurier, l é do a doventèr emportant spazie culturèl e sozièl, de agregazion per l paisc de Cianacei e per duta la comunanza de Fascia.

N muie l é stat la scomenzadives portèdes dant ti meisc passé, dedichèdes a bec, joegn e gregn: no demò filmes, ma evenc che à proà a soscedèr l enteres de desferenta categories de persones, che al Kino à troà lèrga ence per meter dant idees e reflescions.

Te la ultima setemènes, col didament di Servijes Linguistics del Comun General e de Inout, l é stat metù a jir l nef projet ‘Proiezion’, che à chela de engaissèr i joegn del teritorie a viventèr i spazies del chino con idees originèles, outes soraldut a valorisèr l lengaz e la cultura de mendranza, con n eie envers l davegnir.
A la metà de mé l grop de joegn de Proiezion l é stat ence tel Friul, per na fin de setemèna de condivijion co la mendranza furlèna, te chela che l à abù l met de tor pèrt a na lingia de apuntaments endrezé de gra a la bela rei metuda a jir con la neva sociazion Articolo 6, de la mendranzes de la Tèlia. A Udin i joegn fascegn i à podù veder la realtà de Radio Onde furlane e scontrèr musizisć che fèsc toc per lengaz furlan e sona te spazies dediché.
Do na picola paussa te chesta pruma setemènes de jugn, i spazies del chino i averjarà endodanef ai 25 de jugn per la sajon da d’istà, con sacotanta bela neves.

Podede lejer dut su La Usc stampèda dai 19 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)  (Thomas Zulian)