La Usc di Ladins

L’invern vëgn tres plü daimpró. Bele sëgn á indô metü man les competiziuns de jadiné artistich, a chëres che ince nostes atletes y nüsc atlec á tut pert – cun de bi resultac. Tla fin dl’edema passada él insciö gnü desfiré sön les dlaces de Trënt la pröma proa dl campionat talian elite, cun i pröms podesć por jadinadësses y jadinadus ladins. Tl secundo grup dla categoria "Junior Women" él sté Lea Marie Castlunger dl Ice Club Alta Badia che á arjunt la medaia d’arjënt cun 123,11 punc; tla categoria "Advanced Novice Boys" él indere sté Felix Oberbacher che á podü salté söl secundo scalin dl podest cun 100,40 punc. Nia inultima án albü na partezipaziun ladina ince tla "Advanced Novice Girls", olache Elisa Irsara d’Al Plan, che s’alenëia a Porsenú, á arjunt le 7. plazamënt cun 81,34 punc.  (pablo)