La Usc di Ladins

L turnoi de tennis dl’ëiles ora Run­cadic ie chëst ann bele ruvà a si 22ejima edizion. Bele da passa 25 ani incà, per l prim iede tl 1999, mët l Club dal Tennis de Urtijëi a jì chësta manifestazion nternaziunela. L ie na ucajion per la atletes jëunes de desmustré si bona vëta sportiva, de se davanië esperienza y ponc per ruvé plu alauta. Ma l nteres ie nce grant, davia che da chësta sajon iel truepa atletes che cëla de abiné ca mo n valgun ponc per la cualificazions 2026 di Australian Open.

Inier à la atleta de cësa Laura Mair, pudù jughé si prima partida de chësc turnoi. La jëuna de 22 ani de Sëlva, che ia al 586ejim post tla tlassifica WTA, à giapà la wild card dai urganisadëures dl turnoi y se à nscila sparanià la cualificazions.

La speranzes fova grandes, duc canc ulova udëi n bel resultat da pert dla jëuna da tlo, che se alenea cun l Tennis Club Gherdëina y che ie al mumënt la segonda miëura atleta de tennis dl Südtirol. Do 2 ëura y 41 menuc de juech y truepa fadia, ie Mair stata bona de bater si aversera, la jugadëura dla Ucraina Anastasiia Firman, per 6:4; 3:6, 7:6 (5).

EK

L articul ntier tla edizion nueva de La Usc di Ladins de n vënderdi ai 28 de nuvëmber.