La Usc di Ladins

La fin che n se ëssa mbincià ne n'ie ala fin mpo no ruveda, ma l ie na storia de chëla che n se lecurderà mo giut: Laura Mair de Sëlva y Lisa Peer de Bulsan ie ruvedes tla finela dl dopl dla sesta edizion dl turnoi de tennis "ITF Women's Val Gardena Südtirol" da 40.000 $ te Sëlva. Do avëi venciù la semifinela contra l per Noemi Basiletti/Vittoria Paganetti per 6:7(1), 7:6(2), 10-8, te na partida drët emoziunënta y nteressanta nchin ala fin, à la doi atletes dl Südtirol n vënderdi dl'ena passeda, ai 5 de dezëmber, pudù jughé la finela.

La doi jëunes da tlo Mair y Peer à jugà contra la atleta polaca Weronika Falkowska y la atleta dla svizra Celine Naef. Mair y Peer à purtà na prestazion de gran cualità. Sustenides da n bel publich ti ieles states permez a si averseres. Mpo àles ala fin dla finedes perdù per 4:6, 4:6. 

Kubka per l terzo iede prima te Sëlva
N dumënia iel pona mo unì jugà te Sëlva la finela dl singul. La polaca Martyna Kubka ie stata bona de vëncer per 7:5, 6:3 contra si aversera Noma Noha Akugue di Paejes Tudësc. "Chësc ie l majer suzes tl singul de mi cariera", à dit la polaca Kubka do l juech, drët cuntënta. 

EK

L articul ntier tla edizion nueva de La Usc di Ladins de n vënderdi ai 12 de dezëmber.