La Usc di Ladins

Mé 24 ëura do la bela vënta per 6 a 3 contra l EC Bregenzerwald te Sëlva, à l Hc Gherdëina n dumënia ai 7 de dezëmber messù furné via n Cortina per jughé l derby ladin. L fova da tò do l juech che n ne n'ova nia pudù jughé ala fin de utober; ntlëuta òven messù l desdì, davia che i verdiaporta dl Gherdëina fova amalei.

La "furies" à scumencià bën la partida, tl prim tëmp ova chëi de Gherdëina tla man l juech y l manciova mé una na cossa: n gol. Canche degun se l ëssa aspità, à perchël l Cortina fat l 1 a 0 cun Tommaso Alverà, straufan sciche l toca chëi de Gherdëina. Tl segondo tëmp à l arbitradëur smacà ora gor doi dl Gherdëina, sciblan nce un n iede, canche l ne fossa povester nia stat debujën. I averseres se n à juà de chësta situazion y à tucà cun Kris Pietroniros: la stajova donca 2 a 0 per l Cortina. L Hc Gherdëina à reagì y drucà dassënn y nscila ti iel tl 36ejim menut garatà l 2 a 1 cun Hannes Kasslatter. Ma mé n menut y mez do à i patrons de cësa cun Panciera fat l 3 a 1. Tl terzo tëmp ie l Gherdëina stat bon de valivé ora l juech cun i goi de Luke Moncada tl 43ejim menut y Sacha Guimond tl 56ejim. La stajova donca 3 a 3 y n à messù jughé mo n tëmp sëuraprò. Do puec secunc à l Cortina fat l gol dl 4 a 3 cun Kalajanniska, do che l Gherdëina ie unì straufà dal arbitradëur per na faleda. I Ampezans se à nscila davanià doi ponc, ntan che chëi de Gherdëina nen à giapà mé un.

"Na desfata che n ne se ëssa nia merità", scrij l Hc Gherdëina sun si plata internet y n rejona nce de vel' fal dl arbitradëur che à mudà l resultat dla partida.

EK

L articul tla edizion nueva de La Usc di Ladins de n vënderdi ai 12 de dezëmber.