La Usc di Ladins

L ne n’ie belau nia da crëier: l Gherdëina à nsëira batù l Zell am See per 6 a 1 tl sesto juech dla semifineles dla Alps. Dal resultat pudëssen miné che l fova na vënta saurida, ma i fans tl Pranives à zitrà nchin ala fin. Al Gherdëina ti manciòvel mé mo una na vënta per ruvé inant, i Eisbären de Zell am See ëssa mo messù vëncer doi juesc per ruvé tla finela. Y do la vënta straudinera de n sada per 4 a 3 a Zell am See, ie l Gherdëina nsëira stat bon de realisé chël che semiova mpuscibl dan puec mënsc, canche n fova danter i ultims tla tlassifica dla Alps.

Bele tl segondo menut à l Gherdëina nsëira fat l 1 a 0 cun Luke Moncada, pona l 2 a 0 tl 12ejim menut cun Davide Schiavone y dopro l 3 a 0 tl 15ejim menut, mo n iede Moncada. Tl segondo tëmp à l Zell am See drucà dassënn, ma l vantaje de trëi goi a nia à tenì nchin al 41ejim menut, canche i averseres à tucà y fat l 3 a 1. Ala fin à i Eisbären tëut ora si verdiaporta y fat dldut per mudé mo la storia dl juech, ma Hannes Kasslatter à tucà tla porta ueta: 4 a 1 per l Gherdëina. Tl 57ejim y tl 59ejim menut à i ladins mo fat l 5 y l 6 a 1 cun Luca Biondi y Vlastimil Dostálek. 

L Gherdëina ie tla finela. Contra chi che n messerà jughé savràn n juebia sëira, canche l Maran s’la fajerà ora tla Croazia contra l Sisak chi che sarà i segondi finalisć.

EK