La Usc di Ladins

»Città invisibili« l’é n liber de zirca 400 piates scrit da la giornalista fascèna de Rai Ladinia Margherita Detomas che documentea, con la curiosità de na esploradora e l rigor de na profescionista de l’informazion, na storia con n final mai scrit: chela de l’esplorador Percy H. Fawcett, che del 1925, endèna na sia spedizion te l’Amazonia brasiliana olache l jìa a chierir i segnes de zivilà veiores, l’é desvanì ensema con sie fi e n amich, e de ic no se à mai più sapù sapia.

La publicazion, vegnuda fora a la fin del 2019 per WriteUp Site en colaborazion con Viaggi nel tempo Editore, l’é l frut de passa 20 egn de enrescides e de viajes tel Mato Grosso de la giornalista fascèna e l’é, descheche à scrit te sia nota l’editor »n liber gran desche dut l Brasil«. L rejona de recostruzions storiches, de ziviltà veiores e resćarcheologics, de mic e fegures lejendères, de respet per la popolazions indigenes e de miscionères sènc. Te dut chest l’autora vèrda de tegnir sot control sia pascion e sia emozions fortes, de les sconer tedò l stil de l’investigazion e di reportajes profescionèi, per portèr l letor a cognoscer, desche travers na lingia de documentères, desvalives misteres e marevees de chi lesc.

De più, con l'intervista a l'autora Margherita Detomas, su La Usc stampèda de vender ai 31 de jené 2020.  (Lucia Gross )