La Usc di Ladins

Che él pervedù avisa te la proponeta de reforma de le APT del Trentin?
Se podarà l saer en lunesc ai 10 de firé, canche l’assessor provinzièl Roberto Failoni ruarà te Fascia per la portèr dant a la comunanza te trei scontrèdes publiches: da les 10 da doman te Comun de Moena, da les 2 domesdì te Comun de Sèn Jan e da mesa les 5 domesdì te Comun de Cianacei.
Endèna se sà che l prum sboz perveit de organisèr a livel teritorièl la Aziendes per l Turism te 4 arees metan adum desvalives ambic. Fascia ruassa donca bonamenter ensema con Fiem e Primier. Chest no ge scusa al diretif de la Neva UAL, che l’à manà fora n comunicat critich.
»La Neva UAL palesa si dubies e sia tema envers la neva strategìes de la Provinzia Autonoma de Trent per la reforma de l’APT tel sentir che l’Azienda per l Turism de Fascia podessa vegnir metuda ensema con autres del Trentin. L moviment defat – se lec tel comunicat - l’é spervajo che la tutela e la promozion turistica de n teritorie che à carateristiches storich-geografiches, servijes particolères e na spezifizità unica descheche l’é chela de Fascia con sia mendranza ladina, la cogne portèr inant na sort de promozion mirèda a chesta carateristiches, e che chest tant no posse vegnir fat ensema con de autra realtèdes del Trentin.
Na proponeta neva e desferenta, più percacenta per Fascia – i scrif - podessa esser enveze chela de creèr n ent turistich de promozion che tole ite duc i teritories ladins dolomitans, na sort de APT ladina, n consorzie sora-provinzièl e sora-regionèl, che en colaborazion con la APT de la desvaliva valèdes posse valorisèr e portèr dant dassen noscia identità culturèla ensema con noscia economia, che l’é la medema te duta la valèdes entorn al Sela.«

De più su La Usc stampèda de vender ai 7 de firé 2020.   (lg)